A Deputación de Pontevedra mantén aberto ata o 31 de xaneiro o prazo para participar como alumnado ou influencer no “Hub para a loita contra a fenda dixital e a soidade non desexada no medio rural na provincia de Pontevedra”. O proxecto, que a Deputación de Pontevedra ten en marcha nos concellos da Illa de Arousa, As Neves, Cuntis, Forcarei e Moraña, inclúe unha formación destinada a persoas maiores de 50 anos para alfabetizalas dixitalmente e capacitalas en competencias dixitais co fin de facilitar as súas relacións coas administracións públicas.

Poderán participar nesta iniciativa como alumnas e alumnos persoas nacidas antes de 1973 ou que acrediten discapacidade, presten servizos de axuda a domicilio ou teñan a condición de persoa coidadora con maiores a cargo, sempre que sexan maiores de 18 anos. No caso das e dos influencers (persoas destacadas a nivel municipal e con capacidade de mobilización e influencia sobre outras grazas á demostración en primeira persoa dos beneficios que lles pode reportar o uso de ferramentas sociais) deben ser maiores de 18 anos e estar empadroadas nalgún dos concellos participantes.

Unha vez seleccionadas as e os participantes, 50 en cada concello, desenvolveranse sete accións formativas que versarán sobre a Administración electrónica, o Sergas en liña, a banca móbil, as redes sociais ou a creación de vídeos. Cada acción formativa terá unha duración de 5 horas, e ao final delas haberá un servizo de titorías, dun mínimo de 20 horas, co fin de que o alumnado adquira axilidade, destreza e desenvoltura no uso das ferramentas dixitais e poida formular dúbidas sobre os coñecementos adquiridos.