As deputacións de Pontevedra e Ourense estudarán a posibilidade de presentar unha candidatura conxunta ao programa europeo LIFE para crear corredores verdes nas áreas transfronteirizas con Portugal de ambas as dúas provincias. A iniciativa formulouse na reunión que mantiveron no Pazo provincial ourensán o deputado o deputado de Fondos Europeos da Deputación de Pontevedra, Javier Tourís, e o deputado delegado de Medio Ambiente da Deputación de Ourense, José María Lago, acompañados por membros das unidades de fondos europeos das dúas institucións.

O deputado provincial Javier Tourís destacou que nestes encontros “estamos sentando as bases para colaborar en proxectos que ambas as dúas administracións provinciais consideramos estratéxicos, en consonancia co obxectivo que temos desde o noso goberno de priorizar novas alternativas de mobilidade sostible e de poñer en marcha iniciativas que afonden no respecto ao noso medio ambiente”.

A posible candidatura conxunta ao programa LIFE ten como horizonte a convocatoria de 2026 e pivotaría sobre a apertura de sendas verdes nas zonas transfronteirizas con Portugal, tanto na marxe do río Miño coma da Raia Seca. Os fondos europeos destinados a este plan –que xa cumpriu máis de trinta anos desde a súa creación en 1992– axudan a financiar proxectos relacionados co medio ambiente e accións polo clima, incluíndo iniciativas que transformen camiños en infraestruturas verdes.

Ademais de abordar outras posibles candidaturas conxuntas nos ámbitos da mobilidade e accesibilidade, na reunión tratouse tamén a colaboración entre as AECT (Agrupación Europea de Cooperación Territorial) de Río Miño, na que participa a Deputación de Pontevedra, maila de Raia Seca e Gerês-Xurés da que forma parte a Deputación de Ourense.