O presidente da Deputación de Pontevedra, Luis López, aplaude a rectificación por parte do Concello de Pontevedra sobre a capacidade xestora da Deptutación co Museo e amosa a predisposición do organismo provincial para escoitar propostas sobre o CITA, o Centro de Interpretación das Torres Arcebispais, de titularidade municipal e que leva pechado máis dun ano. “Estamos dispostos a escoitar calquera proposta que pase por enriquecer a oferta museística e cultural de Pontevedra”, respondeu o mandatario provincial á pregunta dun xornalista na habitual rolda de prensa posterior á Xunta de Goberno de cada venres, na que confirmou tamén a apertura das Ruínas de San Domingos ás visitas este domingo.

Antes de tomar unha decisión firme sobre a xestión desta infraestrutura municipal por parte da Deputación, o presidente Luis López agarda que sexa o alcalde, Miguel Anxo Fernández Lores, quen solicite formalmente o traspaso destas competencias, que polo momento só se plasmou nun acordo da Comisión de Cultura do Concello de Pontevedra.

Con todo, o mandatario provincial quixo expresar tamén a súa sorpresa por este ofrecemento. “Só en Pontevedra pasa que o goberno lle pide ao vicepresidente provincial que xestione un activo do Concello”, reflexionou López, quen reclamou tamén ao goberno local de Pontevedra que se desculpe publicamente polos “insultos” ao vicepresidente Rafa Domínguez, ao que teñen acusado de ser incapaz xestionar as súas competencias á fronte do Museo de Pontevedra. “Axudaría moito que en Michelena pediran perdón por insultar a quen agora piden axuda”, rematou Luis López.

audios