O deputado provincial Javier Tourís asistiu este venres en Vilagarcía de Arousa ao acto de comprobación do replanteo das obras de ampliación do saneamento e abastecemento que se acometerán na rúa Muíños de Cea, que se iniciarán de maneira inminente. Para a súa execución, o organismo provincial aprobou unha achega de 92.000 € con cargo á liña 1 de investimentos do Plan +Provincia, coa que se vai financiar a actuación integramente.

O deputado provincial deu conta dos traballos que se realizarán con estes recursos, que permitirán ao Concello de Vilagarcía de Arousa dotar de saneamento e abastecemento a un núcleo de vivendas situadas na rúa Muíños de Cea, en Carballedo. Trátase dun núcleo no que, debido á rasante da rede de saneamento, non é posible a súa conexión coa mesma por gravidade, por iso a opción é dotar á zona de saneamento e depuración autónoma, e ampliar ademais a rede de abastecemento xeral.

Javier Tourís recordou que neste 2025 Vilagarcía de Arousa recibirá 1,5 millóns de euros a través do Plan +Provincia da Deputación. Neste eido enxalzou este programa que representa "á perfección como traballamos, escoitando, atendendo e dando resposta ás demandas dos concellos para o avance do conxunto da provincia". Tamén asegurou que "plans como este permiten que concellos como Vilagarcía de Arousa poidan afrontar investimentos e impulsar actuacións transformadoras como esta nesta parroquia de Carballedo, que melloran a calidade de vida da veciñanza".

Compromiso con Vilagarcía de Arousa

O goberno de Luis López ten un firme compromiso con Vilagarcía de Arousa. Este mesmo luns a Deputación de Pontevedra estivo neste concello con motivo do acto de comprobación de  replanteo das obras de mellora do firme que se acometerán na rúa Fontecarmoa e dous tramos das travesías Rosalía de Castro, no Carril, que recibiron máis de 60.000 € a través do Plan +Provincia. En Fontecarmoa tamén investiu preto de 3 millóns de euros na mellora do pavillón e das instalacións deportivas. En concreto, destináronse xa 2,1 millóns de euros para a ampliación das piscinas, preto de 425.400 euros para o acondicionamento do interior do pavillón e máis de 164.000 euros para a reforma da pista de atletismo. Ademais, tamén se aprobaron preto de 96.000 euros para o saneamento do camiño da Regueira que conduce a Fontecarmoa, outros preto de 60.000 euros para a instalación de dúas pantallas LED e 8.000 € para instalar butacas no pavillón.