A Deputación de Pontevedra acaba de remitir un requirimento á empresa UFD Distribución de Electricidad, S.A. (Fenosa) para que proceda de maneira inmediata á reparación dos danos ocasionados na estrada provincial EP-0002 O Marco–Tomeza–Figueirido como consecuencia das obras executadas na mesma.

Segundo consta no expediente tramitado polo Servizo de Infraestruturas e Vías Provinciais da institución provincial, detectáronse danos reiterados no dominio público viario entre os puntos quilométricos 0+100 e 1+180, así como deficiencias na seguridade viaria e na limpeza da vía, co que a empresa incumpriu as condicións da autorización concedida.

Neste contexto, o vicepresidente da Deputación, Rafa Domínguez, subliñou que “é inadmisible que deixaran a estrada no estado no que está”. Domínguez incidiu en que, aínda que “é necesario facer este tipo de obras”, tamén é imprescindible garantir que “a estrada quede no estado no que debe estar, é dicir, nun estado digno”, polo que reiterou que “desde a Deputación esiximos solucións inmediatas”.

A Deputación lembra que este tipo de actuacións constitúen unha infracción moi grave segundo o Regulamento Xeral de Estradas de Galicia, e que a empresa responsable está obrigada non só a reparar os danos causados, senón tamén a repoñer a estrada ao seu estado anterior. Neste sentido, o requirimento establece un prazo de 15 días para a corrección da situación, advertindo de que, en caso de incumprimento, se iniciará o correspondente expediente sancionador, que podería supoñer multas de entre 25.000 e 250.000 euros.

A institución provincial reitera o seu compromiso coa seguridade viaria e co mantemento adecuado da rede de estradas da súa titularidade, e asegura que fará valer todas as ferramentas legais ao seu alcance para garantir o cumprimento das obrigas por parte das empresas que actúan sobre o dominio público.