Estudos de arquitectura de talla mundial aspiran a rehabilitar o convento de Santa Clara para integralo no Museo de Pontevedra

A Deputación recibiu 23 propostas de empresas individuais e reunidas en UTE dende Tokio, Copenhague, Oslo, Berlín, Londres, Rotterdam ou Braga, ademais de españolas e galegas

26/01/2023

Concurso proxectos rehabilitación Santa Clara

Estudos de arquitectura de talla mundial, tanto consagrados e con premios internacionais como emerxentes e “na cresta da ola”, aspiran a realizar a rehabilitación do convento de Santa Clara para o seu uso dentro do Museo de Pontevedra. A presidenta da Deputación Carmela Silva e o vicepresidente e responsable do Museo César Mosquera, anunciaron hoxe que se recibiron 23 propostas de empresas de 41 localidades ao longo do mundo: Tokio-París, Copenhague, Oslo, Berlín, Londres, Rotterdam ou Braga, ademais de españolas e galegas.

Tanto o número de propostas como a calidade dos estudos aspirantes, segundo explicou o vicepresidente Mosquera, é moi alta, o que ao seu entender amosou que Santa Clara tiña ‘per se’ –e non polos premios de 30.000 euros dos finalistas e 50.000 do gañador- atractivo como para atraer firmas potentes. “O concurso de proxectos funcionou moi ben, extraordinariamente ben”, subliñou, lembrando os ambiciosos e esixentes requirimentos para poder participar.

Segundo subliñou Mosquera, a previsión é que a maior parte dos estudos cubran a puntuación mínima esixida, xa que todos teñen, ou ben unha calidade “enorme” e un largo currículo con premios e recoñecementos, ou ben son emerxentes e na “cresta da ola”, despuntando por traballos feitos máis recentemente. Seguramente –dixo o vicepresidente- quedará un “resaibo amargo” polos que se deixen fóra da selección.

Algúns dos nomes máis ‘exóticos’ da lista de presentados ao concurso son os estudos de Kaan Arquitecten, Kengo Kuma, a UTE Big-Naos-Proskene, ou a UTE liderada polo arquitecto David Chipperfield, que acompañan a outros máis próximos como Nieto Sobejano, Alfonso Penela ou César Portela. O número de profesionais involucrados neste proceso de Santa Clara, segundo Mosquera, son centos, e moitos deles teñen realizado non só traballos de edificación e rehabilitación de museos, senón tamén intervencións en construcións de tipoloxía relixiosa.

Nos vindeiros 15 días realizarase a valoración dos currículos e ‘portfolios’ presentados polos estudos de arquitectura e deixaranse só os cinco mellor valorados, aos que se lle achegará toda a documentación (estudos histórico, arqueolóxico, xeotécnico, cartográfico, de patoloxías...) para que elaboren os seus anteproxectos nun prazo de tres meses.

Se non se producen recursos ou complicacións prevese que o anteproxecto definitivo -elixido polo xurado- se coñeza a principios do verán, para despois adxudicar a redacción do proxecto final, que debería estar redactado a finais de ano. No caso de que non se produzan “perturbacións” a intención será licitar a obra a primeiros de 2024, adxudicar na primavera, e que a actuación estea lista en dous anos, no 2026. “Por agora está a ir todo moi rápido. Se eses prazos van adiante estariamos nun tempo récord, (...) pero sería nun mundo idílico”, recoñeceu Mosquera.

O Museo de Pontevedra, no centro do mundo

A presidenta da Deputación, Carmela Silva, asegurou que o Goberno provincial está “feliz e moi sorprendido do enorme interese que amosaron os estudos de arquitectura máis relevante do mundo e do inmenso número de equipos que se presentaron” á convocatoria. A presidenta afirmou que “fomos tan esixentes que puidemos ter pecado de exceso, pero tiña razón o vicepresidente cando asegurou que se ían presentar os mellores do mundo”.

Xunto coa devolución ao goberno de Polonia do díptico espoliado polos nazis, “estamos poñendo o Museo de Pontevedra no centro das grandes actuacións museísticas do mundo, e iso é para ter un profundo orgullo”, reflexionou a presidenta provincial. Malia amosarse prudente coas datas de previsión, a presidenta asegurou que “o que está a acontecer con Santa Clara é que temos unha especie de anxo democrático que fai que todo saia, porque todo o que planificamos vai mesmo antes de tempo, o cal é moi sorprendente”.

A Deputación segue a buscar a cooperación con outras administracións (nomeadamente, o goberno da Xunta e do Estado) para obter financiamento, “e mesmo tamén optaremos a fondos europeos”, lembrou Carmela Silva. Se isto acontece “será marabilloso, pero aínda que non o consigamos, esta Deputación ten un enorme compromiso coa rehabilitación de Santa Clara, que é a obra de carácter cultural máis ambiciosa agora mesmo en todo o Estado español” e por iso “será unha realidade si ou si, aínda que teñamos que afrontar todo o orzamento e mesmo se o temos que facer por fases”. Neste aspecto Carmela Silva foi contundente: “imos poñer os recursos que sexan necesarios. Non podemos responder do que fagan outras administracións pero estamos facendo presión, e moita, porque deben ter sensibilidade con esta obra e sería inexplicable que non achegasen financiamento”.

ASPIRANTES DO CONCURSO DE PROXECTOS, A NIVEL DE ANTEPROXECTO, PARA A REHABILITACIÓN ARQUITECTÓNICA E AMPLIACIÓN DO RECINTO CONVENTUAL DE SANTA CLARA PARA USO DESTINADO AO MUSEO DE PONTEVEDRA

  1. Aranguren Gallegos Arquitectos S.L.P.
  2. Estudio Barozzi Veiga SLP
  3. M. Carvalho Araújo, Arquitectura e Design, S.A.
  4. De Lapuerta Campo Arquitectos Asociados, S.L.P
  5. Arquitectura Enguita & Lasso de la Vega SLP
  6. Garcés de Seta Bonet Arquitectes
  7. KAAN Architecten B.V.
  8. Kengo Kuma & Associates
  9. NIETO SOBEJANO ARQUITECTOS SLP
  10. TUÑON Y ALBORNOZ ARQUITECTOS S.L.P.
  11. UTE AMANDA LEVETE ARCHITECTS- AYBAR MATEOS SLP
  12. UTE UTE BIG-NAOS-PROSKENE
  13. UTE DCA-CARLOS SEOANE
  14. UTE CESAR PORTELA-CELSO LÓPEZ-JORGE SALGADO-MAGDALENA PORTELA
  15. UTE CREUSeCARRASCO-SERGISON BATES
  16. UTE CRUZ Y ORTIZ-ULARGUI
  17. UTE FRADE LAMELA
  18. UTE GVG-BARDAJÍ
  19. UTE LINAZASORO-SÁNCHEZ-GRIJALBA
  20. UTE MANGADO-BLASCO-QUINTÁNS
  21. UTE PAREDES PEDROSA-ABALO-ALONSO
  22. UTE SANTA CLARA CRBG
  23. UTE SNOHETTA OSLO-ALFONSO PENELA

Galerias de imaxes

audios

Mostrando o intervalo 1 - 3 de 20 resultados.