A Deputación de Pontevedra celebrou con éxito na Finca Mouriscade a segunda poxa de animais de gandería, na que participaron 22 empresas da provincia e doutros puntos de Galicia. Nela vendéronse un total de 11 vacas de raza frisoa, que contaban cun prezo de saída de 1.900 euros, e nalgún caso chegáronse a alcanzar os preto de 3.000 euros.

En canto ás empresas participantes na poxa organizada en Mouriscade, 22, a maioría proviñan do concello de Lalín, aínda que tamén se presentaron firmas doutros puntos da provincia, como Rodeiro. Ademais, o interese pola poxa chegou incluso ao resto de provincias galegas, coa participación de ganderías de Sarria, en Lugo; Santa Comba ou Brión, na Coruña; ou Río, en Ourense.

A granxa da Finca Mouriscade é a quinta mellor explotación gandeira de toda España. En menos de tres anos, a gandería dependente da Deputación de Pontevedra pasou do posto número 35 ao 5 no índice combinado ICO, que avalía a calidade xenética dos animais. Esta clasificación apuntala o centro como unha referencia no sector agrogandeiro nacional e sitúao só por detrás de dúas ganderías barcelonesas, unha coruñesa (terceira) e a lalinense G. B. Gandería.  

As tenreiras que naceron en Mouriscade a partir dos últimos embrións, así como o traballo realizado polo persoal do laboratorio, están a contribuír de xeito decisivo á mellora xenética das ganderías da provincia. Nestes momentos Mouriscade conta con varias reses entre as mellor puntuadas de España.

Galerias de imaxes