O presidente da Deputación de Pontevedra, Luis López, anunciou este venres unha das novidades do encontro do sector turístico provincial, no que se entregarán os I Premios Turismo Rías Baixas, e que terá lugar o vindeiro 28 de maio en Baiona. O mandatario provincial avanzou a participación de Toni Nadal, quen ofrecerá unha conferencia centrada no liderado, o éxito e a superación.

Luis López explicou que esta cita “vai moito máis alá da entrega duns premios”, xa que o obxectivo da Deputación é reunir ao conxunto do sector turístico da provincia para seguir avanzando no posicionamento de Pontevedra como “piar turístico do norte peninsular”. Neste sentido, destacou a importancia de incorporar novas estratexias e experiencias inspiradoras ligadas ao turismo e ao deporte.

O presidente provincial lembrou ademais a estreita relación de Toni Nadal coa campaña de promoción turística da provincia deste ano, “A túa meta, o teu destino”, vertebrada arredor do deporte como elemento diferenciador do territorio. “Estamos convencidos de que a súa visión sobre o éxito e a súa experiencia profesional van ser de grande utilidade tanto no ámbito persoal como no profesional para todas as persoas asistentes”, sinalou. Luis López mostrouse convencido de que este encontro do sector turístico provincial “vai ser un éxito” e permitirá continuar reforzando a marca Pontevedra como referente do deporte e do turismo deportivo.

audios