Un total de 420 mulleres de asociacións de 18 concellos da provincia comezan a próxima semana 26 novas accións formativas enmarcadas no programa “Conectadas” da Deputación de Pontevedra. Esta iniciativa ten como principal obxectivo potenciar a promoción das mulleres a través de accións formativas que este ano se desenvolverán en 53 concellos e contarán coa participación de máis de 4.000 usuarias.

O luns 18 darán comezo oito accións: 12 mulleres da Asociación de Mulleres Rurais A Chanciña (Campo Lameiro) iniciarán un curso de xardinería; 20 mulleres da Asociación Aspadeza (Lalín) e 13 da Asociación Española contra o Cancro de Vigo, cursos de musicoterapia; 19 usuarias da Asociación de Veciños Desenvolvemento Rural da Alberguería (Moraña) e 12 da Asociación Galega Tecendo Sonhos, un curso de ioga; 24 mulleres da Asociación Cultural Persoas Maiores do Rosal, unha acción de sendeirismo; 12 mulleres de Down Pontevedra Xuntos, un curso de teatro; e 15 mulleres da Asociación Española contra o Cancro de Pontevedra, un de ximnasia hipopresiva.

O martes 19 será a quenda de tres novos obradoiros. Neste caso, 15 mulleres da Asociación de Mulleres Rurais Chan dos Castiliños (As Neves) comezarán o curso de alfabetización dixital II; 23 usuarias da Asociación Mulleres Rurais, Consumidoras e Culturais A Xuntanza (Fornelos de Montes), un de poda e tarefas do campo desde a sostibilidade; e 15 da Asociación Mulleres en Igualdade de Moneixas (Lalín), outro de ioga. No caso do mércores 20 de setembro, 12 mulleres da Asociación de Veciños de San Brais de Vinseiro (A Estrada), comezarán unha acción de risoterapia, e 16 da Asociación Cultural e Artística os Contentos (Ponte Caldelas), outra de pilates.

Tamén o xoves 21 de setembro comezarán tres novos obradoiros: 18 mulleres de Medrar 2.0 (Barro) comezarán un curso de musicoterapia, 17 da Casa Cultural Artística e Deportiva de Areas (Ponteareas), o de alfabetización dixital II e 15 usuarias da Federación Cogami Pontevedra (Vigo), o de risoterapia. No caso do venres 22 serán dous os cursos que boten a andar. Por unha banda, 17 mulleres da Asociación de Veciños Santa Apolonia de Guimarei (A Estrada) comezarán a formación en artesanía en coiro, e, polo outro, 13 da Asociación de Mulleres Escola Vella do Hío (Cangas), un de sendeirismo.

Xa por último, o sábado 23 oito entidades da provincia inciarán as accións formativas de “Conectadas”. Así,14 mulleres da Asociación Rurais de Arnois (A Estrada) comezarán un curso de xardinería, 15 usuarias da Asociación de Mulleres Rurais Val da Louriña (Mos), un de sendeirismo, 16 da Asociación Jubilados y Pensionistas de Salceda (Salceda de Caselas), a formación de alfabetización dixital II; 20 mulleres da Asociación Veciñal e Cultural San Martiño de Rebordelo (Cerdedo-Cotobade) un de risoterapia; 24 da Asociación de Mulleres de Moaña (Moaña), un de taichi; 13 usuarias da Asociación Veciñal de Pigarzos (A Lama) comezarán os seus encontros con lectoras; 14 da Asociación Musical Cultura Tirante (Barro), de horta ecolóxica; e, por último, 16 mulleres da Asociación Xubilados e Pensionistas Caldenses (Caldas de Reis) comezarán un curso de poda e tarefas de campo desde a sustentabilidade.

Este ano participan en “Conectadas” 219 entidades de 53 concellos da provincia. Os colectivos puideron escoller entre 30 obradoiros ofertados dentro de cinco bloques temáticos: Emprende, iniciativas sostibles para o emprego, ExpresARTE, Conéctate, Sementa sostibilidade e O teu momento. Coidado e benestar. Todas as accións formativas inclúen, de forma transversal nos seus contidos, o tratamento da igualdade entre homes e mulleres e teñen unha duración de 35 horas.