O departamento de Lingua da Deputación de Pontevedra, da man de Polo Correo do Vento, vén de poñer en marcha ‘O camiño andado das letras’, un proxecto para celebrar o 60 aniversario do Día das Letras Galegas -que se cumpre este ano- cun percorrido polas persoas autoras ás que se lle dedicou historicamente a data máis importante da literatura galega.

A web da Deputación, Segundo explica a deputada de Lingua María Ortega, publicará unha ficha diaria con información sobre as persoas escritoras máis relevantes do país, e todo o material será recollido nunha publicación física que se distribuirá entre os centros de ensino e bibliotecas da provincia.

Cada autora ou autor é protagonista de dúas pezas didácticas, unha destinada ao público infantil e outra ao público adulto. Nelas inclúese unha ilustración, unha pequena biografía, un apartado de ‘grandes éxitos’ e un texto significativo de entre a súa obra, así como unha pequena cita ou comentario de Fernández del Riego –autor homenaxeado este ano- sobre a escritora ou escritor en cuestión.

A responsable de Lingua provincial destaca que o proxecto lánzase agora, a finais de febreiro, facendo coincidir as entregas entre dúas datas sinaladas relacionadas coa escritora galega máis universal, Rosalía de Castro: a primeira ficha subiuse xa á web na data do seu aniversario o 23 de febreiro (Día de Rosalía), e a última farao o 17 de maio, día no que se celebra a chegada á imprenta de Juan Compañel da súa obra ‘Cantares gallegos’. Ata o de agora foron publicadas as fichas de Rosalía de Castro e de Castelao. 

DÍAS DAS LETRAS GALEGAS