A Xunta de Goberno da Deputación de Pontevedra acaba de dar luz verde ao convenio de colaboración co Concello de Vilanova de Arousa para mellorar a mobilidade peonil na EP-9701 entre Baión e András. A obra ten un orzamento de preto dun millón de euros, dos que o 80% (preto de 800.000€) corresponde á Deputación e o 20% restante (preto de 200.000 €) ao Concello, encargado tamén de aportar os case 20.000 euros necesarios para as expropiacións.
 

Estes traballos permitirán poñer fin aos problemas de seguridade viaria nunha estrada na que comparten espazo o denso tráfico rodado co movemento de persoas. “É só un primeiro paso co que comezamos a saldar unha débeda histórica coa veciñanza de Vilanova –asegurou o presidente provincial, Luis López-. E estamos xa en conversacións co Concello para continuar avanzando no seguinte treito desta estrada provincial”.

As obras desenvolveranse nun tramo de 560 metros no inicio da estrada, ao longo do cal se contempla a creación dunha senda peonil de formigón coloreado pola marxe esquerda nos primeiros 500 metros e a creación dunha zona de convivencia entre peóns e vehículos nos últimos 60 metros. Ademais, instalarase unha canle prefabricada de formigón para recoller as augas nos días de chuvia e procederase a realizar os traballos de renovación do aglomerado e realización dunha correcta sinalización horizontal e vertical, entre outras actuacións.