"En vésperas do 25-N, Día Internacional da Eliminación da Violencia Contra a Muller, seguimos demostrando que somos un goberno comprometido coa igualdade", asegurou o presidente da Deputación Luis López ao informar da aprobación de dúas liñas de axudas por valor de 460.000 € para fomentar a igualdade de oportunidades entre mulleres e homes e previr a violencia machista.

"As cifras avalan o noso compromiso coa igualdade: 460.000 € para o fomento da igualdade no 2026 e un orzamento para este servizo que, o próximo ano, medra un 7%", subliñou Luis López. O presidente tamén puxo en valor a "boa xestión" do goberno provincial, "porque se este ano aprobamos estas liñas de axudas en xaneiro, as do 2026 están xa en marcha, un mes antes de que comece o ano, para que poidamos seguir avanzando cantes antes e xuntos na construción dunha provincia libre de violencias machistas".

En liñas xerais, 260.000 € están dirixidos aos concellos de menos de 20.000 habitantes para mellorar a atención integral ás vítimas e ás súas fillas e fillos, axudar a mulleres en situación de vulnerabilidade e, entre outras iniciativas, mellorar a formación e a orientación das mulleres. Por outra banda, os 200.000 € restantes irán destinados a entidades de iniciativa social sen fins de lucro para que poidan poñer en marcha programas de sensibilización, formación e prevención da violencia de xénero, de atención a vítimas de violencia machistas e ás súas fillas e fillos, a mulleres vulnerables ou con dificultades ou, entre outros, para actividades de fomento da igualdade.

videos

audios