O presidente da Deputación de Pontevedra, Luis López, reafirma o compromiso da Deputación no apoio ao tecido empresarial da provincia a través de programas e políticas diversas como a investimento de 3,7 millóns de euros para fomentar o emprego este ano, a completa ocupación do polígono empresarial de Barro-Meis ou as distintas iniciativas postas en marcha para impulsar o emprendemento entre a mocidade. Fíxoo durante a gala de entrega da décimo oitava edición do Premio Xove Empresario do Ano que organizou a Asociación de Jóvenes Empresarios (AJE) de Pontevedra este mércores no Centro Sociocultural de Tenorio, no concello de Cerdedo Cotobade.

“Esta gala que é moito máis ca unha mera entrega de premios. É a constatación de que Pontevedra conta cun tecido empresarial profesional, potente e comprometido; é a demostración da capacidade da provincia para emprender, innovar e destacar nun ecosistema global; e é a evidencia de que os emprendedores e empresarios non son seres malvados, senón persoas que arriscan o seu tempo e patrimonio para mellorar a calidade de vida de todos”, declarou o mandatario provincial nunha gala na que tamén participou o alcalde e deputado provincial, Jorge Cubela; e a conselleira de Infraestruturas e Vivenda, María Martínez Allegue, así como o presidente de AJE Pontevedra, Carlos Fontán, e outros representantes de institucións públicas da provincia e do tecido empresarial.

A gala serviu para entregar distincións a figuras do ámbito empresarial, do emprendemento e da mocidade pola súa contribución ao desenvolvemento económico da provincia coa entrega de galardóns relacionados coa responsabilidade social e empresarial, a innovación, a iniciativa emprendedora e, finalmente, o premio ao mellor empresario novo do ano. “Sexa cal sexa o sector, a antigüidade ou a facturación; todas e todos contribuídes á construción dunha provincia máis competitiva, máis forte e con máis oportunidades”, valorou López despois de recoñecer o labor de AJE e agradecer ao alcalde Jorge Cubela a colaboración para a celebración deste evento en Cerdedo Cotobade.

O compromiso da Deputación coas persoas que deciden emprender unha iniciativa empresarial na provincia centrou a intervención do presidente provincial na gala. “Agradecer, recoñecer e premiar está moi ben, pero as boas palabras non serven de nada senón veñen acompañadas de accións. E na Deputación buscamos sempre espremer ao máximo a colaboración co tecido empresarial. Este ano destinamos a fomentar o emprego 3,7M€, a través de distintas iniciativas de cooperación cos concellos, coa mocidade e con entidades sociais. Impulsamos un dos principais motores económicos da provincia e de Galicia, como é o polígono empresarial de Barro-Meis, completamente ocupado e no que ofrecemos un espazo para novas iniciativas a través do noso viveiro de empresas. Atendemos ao tecido empresarial da man dunha alianza coa Xunta de Galicia, os Polos de Emprendemento, que estenderán as súas raíces por toda a provincia; e recoñecemos o emprendemento entre a poboación máis nova a través dos Premios Provinciais á Xuventudecos que premiamos as mellores iniciativas empresariais”, enumerou López.

Antes de reafirmar o apoio da Deputación ao tecido empresarial da provincia e reiterar o recoñecemento a AJE polo seu labor ao tempo que tendeu a man da Administración provincial para seguir reforzando as colaboracións, Luis López quixo destacar a capacidade da provincia para crear riqueza. “Somos unha provincia pequena en extensión pero con grandes emprendedores, polo que para a Deputación a colaboración co sector empresarial é moito máis ca unha liña estratéxica, é cumprir co noso deber”, rematou o presidente provincial..

Galerias de imagenes