A deputada de Infraestruturas Belén Cachafeiro e o deputado provincial e tamén alcalde de Cerdedo-Cotobade, Jorge Cubela, supervisaron esta mañá o estado das melloras que se están a realizar na estrada provincial EP-0405 entre A Xesteira e Almofrei, onde se están a investir preto de 1,3 millóns de euros. Está xa rematada a actuación de ensanche e mellora da seguridade viaria da estrada, á que se destinaron máis dun millón de euros, e vaise acometer unha actuación para optimizar a súa iluminación, cun investimento de 260.000 euros.

No que respecta ao ensanche e mellora, tal e como recordou a deputada, as obras, totalmente rematadas, afectaron a un tramo de 1,5 quilómetros desta estrada provincial, onde se melloraron as condicións de seguridade e mobilidade peonil mediante a construción dunha senda e dúas zonas de convivencia. En concreto, Cachafeiro detallou que se ampliou o ancho da vía ata un mínimo de 7 metros, se executaron muros para ampliar a plataforma, se creou unha senda peonil de 2,5 metros de ancho ao longo dun quilómetro na marxe esquerda da vía onde a velocidade se limitou aos 30 km/h, se crearon dúas zonas de convivencia de prioridade peonil con velocidade limitada a 20 km/h, se mellorou o trazado desde a conexión coa estrada autonómica PO-233 coa aplicación de novo firme, se executaron obras de drenaxe e canalización para soterrar a rede de alumeado nas zonas de convivencia e se dotou de nova sinalización horizontal e vertical.

Ademais, Cachafeiro recordou que estas obras completaranse con máis recursos, con outros 260.000 euros para mellorar a iluminación dos itinerarios peonís e da zona de tránsito motorizado da vía. Ao respecto, a deputada asegurou que en abril deste mesmo ano se aprobou o proxecto para esta actuación que permitirá instalar novo alumeado no primeiro quilómetro e medio da estrada.

Galerias de imagenes