Máis dun cento de escolares participaron este martes en Vigo no mercado de DepoEmprende na Escola, unha iniciativa integrada no programa provincial DepoEmprende que fomenta a cultura emprendedora nos centros educativos mediante a creación e xestión de cooperativas escolares.

A vicepresidenta da Deputación de Pontevedra e deputada de Economía e Impulso ao Emprego, Luisa Sánchez, visitou os postos instalados no peirao de A Laxe, onde o alumnado expuxo e comercializou os produtos elaborados ao longo do curso, culminando así unha das fases máis visibles do proxecto.

Luisa Sánchez percorreu os diferentes postos instalados no porto de Vigo en compañía de diferentes axentes empresariais, comerciais e do sector servizos. Canda eles, puido coñecer o traballo desenvolvido polo alumnado coas súas cooperativas: Souvenirs Company, do CEIP San Tomé de Cambados; As cores de Carballedo 6.0, do CEIP Plurilingüe de Carballedo, en Cerdedo-Cotobade; Puntadas Soñadoras e Sete Puntadas, do CEIP Plurilingüe de Tebra, en Tomiño; Tigrecoop, do CEP Plurilingüe Igrexa Valadares de Vigo; e Andoriñas, do CPR Andersen Augalonga, tamén de Vigo.

A vicepresidenta destacou a implicación do alumnado e do profesorado cun programa que achega o emprendemento ás aulas a través de experiencias reais de aprendizaxe. Neste sentido, subliñou que iniciativas como DepoEmprende na Escola contribúen a desenvolver competencias clave entre a mocidade, ao tempo que fomentan valores como a creatividade, a responsabilidade e o traballo en equipo.

Galerias de imagenes