A Deputación de Pontevedra continúa coa programación dos obradoiros de Provincia Activa, iniciativa coa que impulsa o envellecemento activo das persoas maiores, fomentando a súa participación para crear espazos de encontro e intercambio de experiencias. Esta semana comezarán 21 novas accións en outras tantas entidades sociais que mobilizarán preto de 400 veciños de 15 concellos da provincia: Arbo, Catoira, Meaño, Mondariz, Moraña, As Neves, Nigrán, Ponteareas, Pontevedra, Redondela, Salceda de Caselas, Sanxenxo, Soutomaior, Tui e Vilagarcía de Arousa.

Os obradoiros dan comezo este luns 29 de setembro cunha actividade de informática avanzada para a Asociación de Xubilados e Pensionistas de Salceda de Caselas e outra de ximnasia de mantemento para a Asociación de Mulleres Rurais e Consumidoras O Corazón do Salnés (Meaño). O martes 30 de setembro a Casa Cultural Artística e Deportiva de Areas (Ponteareas) e a Asociación de Veciños San Antonio de Arbo inician dous formacións en habilidades dixitais para uso cotiá. Pola súa banda, o mércores 1 de outubro arrancan dous cursos de ximnasia de mantemento para a Asociación de Mulleres Rurais e Consumidoras A Telleira de Dena (Meaño) e para a Asociación de Consumidores Muíños de Vento (Catoira), un de plantas medicinais para a Asociación de Veciños Desenvolvemento Rural de Alberguería (Moraña), e un de ioga para a Asociación Cultural Xeada e outro de restauración de mobles e tapicería para a Asociación de Veciño Agustín Romero, en Vilagarcía de Arousa.

O xoves 2 de outubro as formacións continúan con seis obradoiros, entre eles, dous de plantas medicinais para a Asociación de Veciños San Cibrán de Ribarteme (As Neves) e para a Asociación  de Veciños Xabriña (Mondariz); un de habilidades dixitais para a Asociación Veciñal e Deportiva Cultural Miñoteira (Redondela); un de pilates para a Asociación de Mulleres Rurais Os Borrizos de Cornazo (Vilagarcía de Arousa); un de restauración de mobles e tapicería para a Asociación de Mulleres Rurais Anduriña de Arcade (Soutomaior) e un de informática avanzada para o Centro Social Cultural e Recreativo de Cedeira (Redondela).

Ademais, o venres 3 comeza unha actividade de restauración de mobles e tapicería na Sociedade Cultural do Viso (Redondela), unha de informática avanzada no Centro Recreativo e Cultural O Torreiro (Nigrán), unha de bailes de salón na Asociación da Terceira Idade Nevox (Vigo), unha de plantas medicinais no Club de Pensionistas de Sanxenxo e unha de pandeireta e canto popular no Centro Social de Tui. Finalmente, a axenda da semana péchase o sábado 4 na Sociedade Cultural Deportiva San Martín de Verducido (Pontevedra), onde comezará unha formación en restauración de mobles e tapicería.

A Deputación ofertou neste 2025 14 obradoiros no catálogo de Provincia Activa, divididos en seis bloques temáticos: "Benestar natural" (Plantas medicinais), "Saúde en movemento"  (Pilates, ioga e ximnasia de mantemento para persoas maiores), "Emociónate" (Conservando a memoria, Musicoterapia, Risoterapia e Terapia emocional: Positividade e canalización das emocións), "Outra vida" (Teatro e Restauración de mobles e tapicería), "Con ritmo!" (Bailes de salón e Pandeireta e canto popular) e "Reder@s" (Habilidades dixitais para uso cotián e Informática. Nivel Avanzado). Provincia Activa conta este ano cun orzamento de 146.000 euros e ao longo do ano desfrutarán dos obradoiros 130 entidades de 40 concellos da provincia.