O presidente da Deputación de Pontevedra, Luis López, deu conta este venres do visto bo a novos recursos ao abeiro do III Plan Extraordinario de Infraestruturas Deportivas para o Concello de Vilaboa, que recibirá máis de 110.000 euros para poñer en marcha unha pista de pádel cuberta. Ademais destes recursos para Vilaboa, a Xunta de Goberno do organismo provincial tamén aprobou esta semana outros preto de 500.000 € para que Pazos de Borbén, O Rosal, Salvaterra de Miño e Vilagarcía de Arousa impulsen e melloren dotacións deportivas baixo o paraugas deste plan provincial.

“Estes son cinco exemplos máis de como o III Plan Extraordinario de Infraestruturas Deportivas, que nesta terceira edición está a repartir 8 millóns de euros entre os concellos de menos de 50.000 habitantes da provincia, nos está axudando a construír a provincia do deporte na que queremos que se converta Pontevedra”, asegurou o presidente da Deputación.

Coa axuda aprobada na Xunta de Goberno, a totalidade da contía que Vilaboa ten á súa disposición no marco do III Plan Extraordinario de Infraestruturas Deportivas, o concello poderá impulsar a construción dunha pista de pádel panorámica con cuberta nunha zona que funciona hoxe en día como aparcamento ocasional. En concreto, o proxecto contempla a preparación completa do terreo, a execución dunha soleira de formigón e a instalación dunha pista de pádel de 20 por 10 metros con peche de vidro temperado, estrutura metálica, iluminación e pavimento de céspede artificial. No relativo á cuberta, que busca que a pista sexa accesible todo o ano, será metálica de aceiro laminado, con perfís estruturais dimensionados para garantir estabilidade e durabilidade. A actuación completarase co acondicionamento da contorna, pintando novas prazas de aparcamento e delimitando o espazo. Por último, procederase a instalar un sistema automatizado de reservas, control de accesos e iluminación.

audios