Familia: Magnoliaceae  

Árbore caducifolia

Floración: primavera

Orixe: nativo dos Estados Unidos e Canadá

Porte e altura: pode acadar os 25 ou 30 m de altura e o seu porte natural é piramidal. A súa copa é ampla, con ramas horizontais que se estenden de maneira uniforme.

Follas: alternas, de entre 10 e 20 cm, pecioladas, de cor verde clara, con forma distintiva catro veces lobulada apuntando cara a fóra (de maneira informal dise que teñen forma de cabeza de gato).

Flor: solitaria, de entre 4 e 5 cm de diámetro, cos sépalos de cor branca ou amarelenta e os pétalos da mesma cor, pero cunha franxa alaranxada na base; a súa forma é similar ao tulipán, de aí procede o nome común da árbore.

Froito: cono leñoso que se desfai na madurez, formado pola unión de moitas sementes aladas.

Outros datos: a súa cortiza é parda, gretada e escamenta nos exemplares vellos.

Utilidades e curiosidades: árbore robusta e lonxeva, de interese ornamental polo seu porte e pola beleza das súas flores e a coloración outonal e forma das súas follas. Florece ao pasar dos quince anos de idade. A madeira é lixeira, branda e duradeira, de cor amarela clara. No seu lugar de orixe úsase para construción de mobles, barcas ou acabados no interior de vivendas.

Necesidades e cultivo: adáptase ben a diversas condicións, incluíndo solos arxilosos e areosos, aínda que prefire exposicións soleadas, solos ricos en nutrientes e boa drenaxe. É unha especie resistente e relativamente sinxela de coidar. Débese ter en conta que é unha árbore que acada grandes dimensións e necesita bastante espazo.