A Deputación de Pontevedra pecha os obradoiros de marisqueo do proxecto Awaves (ondas atlánticas para promover un turismo e un patrimonio sustentables, equitativos e innovadores), cofinanciado polo Fondo Europeo de Desenvolvemento Rexional (FEDER) a través do Programa Interreg Atlantic Area 2021-2027, coa participación de preto de 1.200 persoas. En total, o organismo provincial ofertou 82 rutas sensoriais gratuítas por praias das rías de Arousa, Pontevedra e Vigo para achegar á cidadanía o patrimonio marítimo e marisqueiro a través de experiencias participativas e educativas.

Neste mes de outubro péchanse os obradoiros sensoriais que levarán a preto de 700 persoas a visitar as tres rías Baixas. Deste xeito, o xoves 8 de outubro, e os días 27 e 28 de outubro terán lugar actividades na contorna de Praceres-Lourizán (Pontevedra); o venres 9 e os días 26 e 29 de outubro por Ameixal (Pontevedra); o 13 e 14 de outubro por Combarro (Poio); o 15 e 19 de outubro pola praia de Compostela (Vilagarcía de Arousa); o 16 e 22 de outubro pola praia Aguiuncho (A Illa de Arousa); o 20 de outubro por praia Deilán (Vilaboa); e o 23 de outubro pola praia da Barra (Redondela).

Para estes últimos obradoiros de marisqueo de Awaves rexistrouse unha elevada demanda de centros educativos, con preto dunha vintena de colexios de educación infantil e primaria, institutos de ensino secundario, obradoiros de emprego e centros rurais agrupados de dez concellos da provincia e mesmo procedentes doutros lugares de Galicia como Lugo. A institución provincial achega ás persoas participantes chalecos, luvas, calcetíns e botas para a realización dos obradoiros sensoriais de marisqueo.

Galerias de imaxes