Emilio Rúa. 25 aniversario

Emilio Rúa celebra o seu 25 aniversario desde a saída do seu primeiro disco no ano 2000 cun percorrido pola súa discografía con cancións coma Vida miña, elixida polas lectoras e lectores de La Voz de Galicia como unha das dez mellores cancións galegas de todos os tempos, ou versións coma A Carolina, que sorprende nos seus concertos. Neles actúa en solitario coa súa guitarra e harmónica, dun xeito intimista pero cheo de enerxía e sensibilidade.

Emilio Rúa é unha das voces galegas máis recoñecidas, na súa longa traxectoria conxugou con composicións propias a canción de autor, a música tradicional e o pop; publicou unha ducia de discos; realizou preto de 200 concertos e púxolles voz aos poemas das e dos grandes autores da nosa literatura; ademais, cantou a dúo en galego con artistas da altura de Víctor Manuel, Pablo Milanés, Rozalén, Carlos Goñi ou Sole Giménez.

Óscar Ibáñez. Tribal

Tribal é o novo espectáculo do gaiteiro e frautista pontevedrés Óscar Ibáñez, co que celebra o 20 aniversario da súa traxectoria artística. Nel combina novas creacións con algúns dos temas máis destacados dos seus discos nunha espectacular viaxe sonora chea de orixinalidade, imaxinación e creatividade na que predomina o son celta. Nesta proposta altamente enérxica e dinámica, as melodías tradicionais galegas, peninsulares e europeas enriquécense con variacións e voces virtuosas elaboradas a partir dunha linguaxe actual, sobre unha base rítmica contundente, na que os ritmos galegos se mesturan con outros xéneros europeos e americanos.

Óscar Ibáñez é un artista fascinante que, partindo das súas raíces, crea unha fusión musical atlántica, entre investigación e creación, o que dá como resultado un son engaiolante con selo propio. Realizou máis de 250 concertos por toda a península ibérica, Alemaña, Bretaña e Italia, e participou nalgúns dos festivais folk internacionais máis importantes e en máis de 20 traballos discográficos, entre os que destacan os seus discos en solitario Alén do mar (VIR, 2012) e Aires de Pontevedra (Inquedanzas Sonoras, 2017). Tamén é ideólogo e creador de eventos coma MUSGAFOL, o Encontro de Gaiteiros Manuel Villanueva, Gaitas do Noroeste, Juelles, Encontro de Gaitas Europeas, Piperegrinos, As Gaitas do Camiño e as xornadas O Son da Gaita.

Destaca tamén a súa ampla traxectoria docente en diferentes asociacións, escolas de música e centros galegos en máis dunha decena de países de Europa e América, así como a súa participación nos máis importantes certames galegos de gaitas, nos que recibiu máis de corenta premios.

Carlos Núñez. Lugares máxicos

Este frautista e gaiteiro é un dos grandes referentes da nosa música. Ao longo da súa extensa carreira profesional actuou en moitos países e con grandes músicos internacionais, colleitando un grande éxito e vendendo milleiros de discos. Participou tamén en grandes bandas sonoras, desde a premiada Mar adentro ata varias no Xapón, pasando por versións celtas de grandes clásicos do cine. Obtivo o premio Ondas, dúas candidaturas en solitario aos Grammy latinos e varios galardóns por todo o mundo, entre eles o Premio da Cultura Galega e a Medalla de Ouro de Galicia. Foi nomeado Embaixador Europeo do Medio Ambiente e coas súas actuacións en marcos naturais acadou esa identificación da marca cultural e patrimonial da nosa comunidade coa súa música persoal, enraizada e pluricultural.

Este concerto seguirá a liña de Lugares máxicos, unha xira que Carlos Núñez comezou hai oito anos para  tocar no verán en localizacións fermosas de Galicia e poñer en valor o noso patrimonio musical, arquitectónico, gastronómico e natural. Ademais, trátase dun modelo respectuoso coa natureza e co medio ambiente,  xa que se aproveita a luz solar e as acústicas naturais dos lugares, sen os excesos de produción habituais neste sector.

Querida Montserrat, querido Luciano. ÓperaConcert

Un recital lírico que lles rende homenaxe a Montserrat Caballé e Luciano Pavarotti a cargo de ÓperaConcert, e que contará coa presenza da neta de Pavarotti Simona Todaro e Montserrat Martí Caballé, filla da recoñecida artista, ademais da soprano lixeira galega Loli Crespo, o barítono Luis Santana e o mestre Víctor Carbajo ao piano. Un italiano e unha española unidos polo cordón umbilical do canto.

O espectáculo inclúe un repertorio da canción e da ópera italiana en recordo de Luciano Pavarotti, así como arias de ópera, canción española e zarzuela por Montserrat Caballé, con títulos coma O mio babbino caro, Ave María, O sole mio ou Nessun dorma, entre outras. As anécdotas compartidas polas e polos artistas chegarán ao público dun xeito espectacular e cheo de cariño.

Descubrindo a Valle-Inclán. Teo Cardalda e María Monsonís

Este espectáculo musical teatralizado creado polos artistas galegos Teo Cardalda e María Monsonis inclúe poemas de Ramón María del Valle-Inclán e música de Teo Cardalda. Está inspirado no seu traballo discográfico Claves líricas, o cal foi editado por Altafonte e contén un libro disco con manuscritos, fotografías, láminas inéditas, ademais de nove poemas musicalizados polo propio artista.

Con este espectáculo preténdese achegarlle a figura de Valle-Inclán e toda a súa dimensión creativa á súa provincia natal, Pontevedra, coa que tivo un vínculo especial desde as súas raíces, a súa estancia en Pontevedra cidade, onde editou o seu primeiro libro Femeninas (1895), e a súa vida en Cambados, que, sen dúbida, marcou a súa traxectoria e o seu proceso creativo. Unha obra musical e teatral que ten por finalidade difundir, desde un punto de vista divulgativo e popular, as palabras do escritor vilanovés e galego universal, a través dos seus poemas e reflexións, pasaxes de misterio, rituais e fantasías, coa súa contemplación da vida e co seu quietismo estético.