Baseado no I Plan estratéxico de xuventude da Deputación de Pontevedra, o programa "Xuventude a máis" nace coa intención de poñer á disposición da mocidade espazos de aprendizaxe práctica, creativa e transformadora, fomentando así a curiosidade, a colaboración e a responsabilidade social. Así mesmo, pretende reforzar o sentimento de pertenza á provincia, ao poñer en valor os recursos locais, a cultura galega e os valores da sostibilidade e a igualdade.

Que ofrece o programa?

O programa ofrécelles aos concellos de menos de 20.000 habitantes ata 102 obradoiros agrupados en tres áreas temáticas:

• Área temática 1. Habilidades para o benestar e o coidado persoal
  • Economía do fogar
  • Seguridade básica para a mocidade: primeiros auxilios básicos e defensa persoal
  • Cociña, nutrición e mitos alimentarios
  • Saúde mental (autocoidados)
• Área temática 2. Expresión artística e cultura
  • Curso de DJ
  • Iniciación á música tradicional galega
  • Edición de vídeo e fotografía
  • Deseño e creación de produtos gráficos e mercadotecnia
• Área temática 3. Conexión e coidado da contorna
  • Sendeirismo, orientación e interpretación do patrimonio natural
  • Horta urbana e xestión biolóxica do solo (permacultura e fertilizantes)
  • Reciclaxe de mobles e obxectos
  • Adestramento canino

Pódese consultar información sobre todos eles no anexo II: catálogo de obradoiros.

Asignación de obradoiros

Garantirase un mínimo de dous obradoiros por concello, que poderá optar a un máximo de catro:

• No caso de que, unha vez realizada a adxudicación inicial, non se cubrise o total de 102 obradoiros, os cursos restantes asignaránselles aos concellos que solicitasen obradoiros adicionais.
• A asignación dos obradoiros adicionais realizarase por orde de presentación das solicitudes.

Condicións de execución e participación

• Características dos obradoiros
  • Duración: 20 horas por obradoiro.
  • Modalidade: presencial, impartidos por unha empresa especializada.
  • Prazo de execución: entre os meses de setembro de 2026 e marzo de 2027.
• Criterios de participación do alumnado
  • Persoas destinatarias: mozas e mozos de entre 16 e 35 anos.
  • Custo: 5,00 € por persoa e obradoiro.
  • Límite de prazas: mínimo de 7 persoas e máximo de 15 por obradoiro.
• Selección do alumnado
  Os concellos beneficiarios encargaranse de seleccionar as persoas participantes, para o que deberán ter en conta os seguintes criterios:
  • En primeiro lugar, terán prioridade as solicitudes das mozas e mozos empadroados no propio concello, segundo a orde de inscrición.
  • En segundo lugar, teranse en conta as solicitudes presentadas polas mozas e mozos empadroados noutros concellos de menos de 20.000 habitantes, atendendo tamén á orde de inscrición.

Presentación de solicitudes

O prazo para a presentación de solicitudes será do 19 de xaneiro ao 6 de febreiro de 2026. Os concellos deberán presentar as solicitudes a través da Sede electrónica da Deputación de Pontevedra.