Un grupo de 15 persoas participará este mércores 12 de agosto no Castelo de Soutomaior nunha nova actividade do programa Cata con Historia, promovido pola Deputación de Pontevedra para achegarse á historia do castelo e aos viños da Denominación de Orixe Rías Baixas. A actividade estará centrada no fenómeno da eclipse que se vivirá durante esta xornada, e que terá o seu momento álxido arredor das 20:30 horas, e estará a cargo do sommelier Jacobo Rivas, encargado da selección completa dos viños de cada unha das citas. As prazas para esta e a totalidade das tres quendas organizadas este ano en Cata con Historia, nas que participarán un total de 45 persoas, esgotáronse en tan só trinta minutos desde a apertura das inscricións o pasado venres 31 de xullo.

A actividade deste mércores, “A eclipse no viñedo”, combina a cata coa observación da eclipse solar. A sesión avanza “de luz a sombra”, dos viños máis novos e luminosos aos de maior crianza, mentres todas as persoas asistentes contarán con material homologado para seguir a eclipse, da que haberá unha breve explicación. A cata contará con maridaxe de produto local de tempada.

Finalmente, o 20 de agosto, terá lugar “O reto do sommelier”, unha cata a cegas por parellas ou pequenos grupos, guiada con pistas de Jacobo Rivas e combinada con produto local de tempada. Trátase dun formato lúdico e participativo e dunha cita co viño, coa memoria e a paisaxe. As actividades deste ano estreáronse o pasado xoves con “Rías Baixas de norte a sur”, unha cata horizontal que percorreu as cinco subzonas da D.O. Rías Baixas (Val do Salnés, Condado do Tea, O Rosal, Ribeira do Ulla e Soutomaior) para amosar como o chan e a proximidade ao mar transforman o albariño e outras variedades autóctonas.

Os viñedos do Castelo de Soutomaior, que se estenden en catro hectáreas (o recinto ten unha extensión de 23), foron plantados en 1984. A uva é autóctona, na súa maioría albariña, con presenza doutras variedades brancas como o godello, torrontés, loureiro e treixadura, e mesmo tintas, como o mencía e o sousón.