O presidente da Deputación de Pontevedra, Luis López, informou este venres da aprobación das axudas da terceira convocatoria do Plan +Xuventude, que beneficiarán a un total de 27 colectivos de 17 concellos da provincia para poñer en marcha iniciativas de interese social. Trátase dun incremento do 23% respecto aos 22 colectivos que recibiron achegas na anterior convocatoria, e dun 15% de recursos fronte aos 100.000 euros aprobados nesta. O presidente sinalou que “a xuventude é un dos asuntos que máis nos preocupan” e, grazas a estes recursos, impulsarán “charlas sobre economía, actividades culturais e deportivas, un campamento xuvenil, e moitas outras actividades nas que tamén salienta o apego polo territorio e polo rural da provincia”.

Nas comarcas de Deza e Tabeirós-Terra de Montes, 13.000 € irán parar a colectivos de Agolada, Silleda e Forcarei. Na comarca do Salnés, reciben máis de 18.000 € colectivos de Ribadumia, Sanxenxo, Vilagarcía de Arousa e Vilanova de Arousa. Na comarca de Pontevedra, benefícianse de preto de 47.000 € colectivos de Barro e Pontevedra. Na cidade de Vigo recibirán 25.000 € cinco colectivos, e nas comarcas do sur da provincia recibirán máis de 77.000 € colectivos da Guarda, Nigrán, Ponteareas, Redondela, O Rosal, Salvaterra de Miño e Tui.

O presidente Luis López asegurou que “continuamos traballando a prol da xuventude da provincia, cunha aposta decidida por permitirlles ás mozas e mozos desta provincia que teñan en Pontevedra unha provincia próspera onde desenvolver os seus proxectos de vida”. O presidente da Deputación asegurou que se trata dun paso “necesario para poder facerlle fronte ao reto demográfico que atravesa esta provincia”.

As axudas do Plan +Xuventude están destinadas a asociacións xuvenís e grupos dirixidos á xuventude e sen ánimo de lucro, formados por entre tres e oito persoas con idades comprendidas entre os 18 e 35 anos que propoñan a realización dun proxecto de interese social. As propostas deben estar relacionadas coa saúde, o benestar e a prevención de riscos; coa cultura, a ciencia e a innovación, coa participación xuvenil, o asociacionismo e o voluntariado; co desenvolvemento rural e o reto demográfico; e coa protección do medio ambiente e a loita contra o cambio climático. As entidades xuvenís poden recibir ata un máximo de 5.000 euros para iniciar proxectos que favorezan o desenvolvemento persoal e comunitario, contribúan á formación en valores e á consecución de hábitos saudables.

audios