A Deputación de Pontevedra, a través do Servizo de Xuventude e Reto Demográfico, promove a segunda edición desta convocatoria de axudas co obxectivo de proporcionarlles ás asociacións e aos colectivos xuvenís apoio na posta en marcha de proxectos nos que a xuventude participe de forma activa e directa en actividades concibidas por ela mesma e das cales sexa protagonista.

A convocatoria está dirixida a apoiar iniciativas, promovidas por persoas de entre os 18 e os 35 anos de idade e asociacións xuvenís que desenvolvan proxectos que favorezan e promovan o desenvolvemento persoal e comunitario, contribúan ao apoderamento xuvenil, á formación en valores e á consecución de hábitos saudables, e enriquezan a vida social, económica, científica e cultural da provincia. Estas iniciativas e proxectos deben realizarse e idearse durante o ano 2025.

A concesión das axudas tramitarase en réxime de concorrencia competitiva, de acordo cos criterios de concesión indicados na base décimo terceira.

Prazo de presentación de solicitudes desde o 17 de febreiro ata o 14 de marzo de 2025.

Poderán ser destinatarios destas subvencións:

• As asociacións xuvenís prestadoras de servizos dirixidos á mocidade, sen ánimo de lucro, non sometidas a ningún réxime asociativo específico e con sede social ou cunha delegación na provincia de Pontevedra.
• Os grupos formados por un mínimo de tres e un máximo de oito persoas con idades comprendidas entre os 18 e os 35 anos no momento de presentar a súa solicitude para esta convocatoria, aínda que carezan de personalidade xurídica ao non estar constituídas como asociación, e que propoñan un proxecto de interese xeral e social (son os grupos informais).

As iniciativas presentadas englobaranse nalgunha das seguintes áreas de actuación:

• Iniciativa empresarial.
• Vida saudable e loita contra a violencia e conductas de risco.
• Fomento da cultura en todas as súas áreas e da innovación, así como promoción de sectores coma o científico, tecnolóxico e dixital, as ciencias xurídicas e as sociais.
• Creación de consellos locais de xuventude e fomento do asociacionismo e do voluntariado xuvenil.
• Promoción do desenvolvemento e dinamización do medio rural.
• Protección do medio e loita contra o cambio climático.

A dotación destinada a esta convocatoria é de cento vinte mil (120.000,00) euros, con cargo á aplicación orzamentaria 25/233.2310.480.02, condicionada á existencia de crédito adecuado e suficiente no momento da súa concesión. O importe máximo subvencionado por proxecto será de cinco mil (5.000,00) euros.