A Deputación de Pontevedra pecha este venres 31 de xullo no Grove e en Meis a xira de contacontos ilustrados e musicados “As letras de Begoña Caamaño”. Trátase dunha iniciativa cultural que entre maio e xullo percorreu 35 concellos de menos de 50.000 habitantes da provincia para poñer en valor a figura da xornalista e escritora homenaxeada neste 2026 pola Real Academia Galega.

O contacontos, que terá lugar ás 10:30 horas na Casa da Cultura Manuel Lueiro Rey do Grove e ás 12:30 horas na Praza de Abastos de Meis, está dividido en tres partes, nas que se alternará a narración da biografía de Begoña Caamaño, a realización dunha ilustración e de distintas interpretacións musicais. A continuación xerarase un debate arredor da figura homenaxeada nas Letras Galegas deste ano e rematarase cun obradoiro no que todas e todos os asistentes realizarán unha caricatura da autora.

Begoña Caamaño desenvolveu a maior parte da súa carreira profesional na Radio Galega, onde traballou nos servizos informativos e culturais e dirixiu programas como Andando a Terra ou Club Cultura, caracterizándose sempre por un xornalismo comprometido coa realidade social galega. Como escritora, acadou un gran recoñecemento con novelas como Circe ou o pracer do azul (2009) e Morgana en Esmelle (2012). Ademais da súa faceta literaria e xornalística, destacou polo seu compromiso co feminismo, coa defensa da lingua galega e coa participación en movementos sociais.

“As letras de Begoña Caamaño” percorreu entre maio e xullo, ademais dos concellos do Grove e Meis, Bueu, Mos, Mondariz Balneario, Vilanova de Arousa, Poio, Cangas de Morrazo, Rodeiro, Vila de Cruces, Agolada, Forcarei, Lalín, Silleda, Soutomaior, Moaña, Arbo, Oia, O Porriño, Gondomar, A Guarda, Tomiño, O Rosal, Valga, Pontecesures, Cerdedo Cotobade, Ponteareas, Covelo, Ribadumia, Vilagarcía de Arousa, A Estrada, Moraña, Ponte Caldelas, Nigrán e Baiona.