O presidente da Deputación de Pontevedra, Luis López, vén de inaugurar este domingo o novo campo de fútbol de San Mateo, en Ponteareas, un proxecto valorado en 375.000 euros, financiado ao 100 % polo organismo provincial e que “consolida á provincia como campioa do mundo do deporte”, afirmou o presidente, nun acto no que tamén participaron representantes do tecido deportivo de Ponteareas, a alcaldesa Nava Castro e o presidente da Real Federación Española de Fútbol, Rafael Louzán; ao que López felicitou polo éxito da segunda estrela conseguida pola Selección Española. O mandatario provincial subliñou a aposta da Deputación pola mellora das instalacións deportivas municipais, nas que van mobilizados 30M€ a través das tres convocatorias do Plan Extraordinario de Infraestruturas Deportivas; e das xestionadas directamente polos clubs deportivos, co anuncio dunha liña de subvencións específicas dotadas con 1,8M€ para a mellora dos seus locais, terreos ou equipamentos.

A obra para o novo campo de fútbol de San Mateo, en Ponteareas, foi executada en dúas fases e financiada de xeito íntegro pola Deputación. Na anualidade do ano 2024, o organismo provincial destinou 134.000€ da primeira convocatoria do PEID e 43.460€ do +Provincia, á demolición das antigas instalacións e preparación do terreo para instalar o novo céspede; mentres que ao ano seguinte, cunha achega de 197.250€ procedentes da segunda convocatoria do PEID, a intervención serviu para instalar unha capa de herba artificial de última xeración, así como os materiais necesarios para a practica do fútbol. Un proxecto que demostra a flexibilidade da Administración provincial cos concellos para sacar adiante actuacións estratéxicas e unha intervención moi demandada para resolver dunha vez por todas os problemas de mantemento que arrastraba esta infraestrutura ao trocar o céspede natural por unha solución artificial de maior calidade e durabilidade. “Poñemos a disposición da veciñanza de Ponteareas unha instalación moderna, de calidade e axeitada para a práctica deportiva”, remarcou López.

Este proxecto supón unha nova mostra do impulso que a Deputación lle está a dar ao deporte provincial desde todos os ámbitos. Nestes tres anos de mandato, o goberno provincial ten repartido máis de 5.000 axudas a deportistas e clubs, ten posto en marcha iniciativas que fomentan o deporte como O Noso Club, +Talento Motor ou DepoVAN; consolidou as Rías Baixas como un recinto polideportivo ao aire libre capaz de acoller eventos tanto de ámbito internacional como rexional e está revolucionar as infraestruturas deportivas. “Esta mesma semana anunciabamos o primeiro programa Prodeporte con 1,8M€ en axudas específicas para que os clubs deportivas melloren os seus locais, terreos ou equipamentos; e cos Plans Extraordinarios de Infraestruturas Deportivas levamos mobilizados 30M€ en tres anos nas instalacións municipais dos concellos de menos de 50.000 habitantes da provincia”, salientou o dirixente.

Neste sentido, matizou tamén Luis López que o apoio da Deputación ao Concello de Ponteareas non se limita unicamente ás infraestruturas deportivas ao lembrar a recente inauguración dunha ludoteca e dunha escola infantil nas que o organismo provincial achegou case 600.000€ e que forman parte dunha pegada da Deputación en Ponteareas de máis de 7,5M€, dos que máis de medio millón de euros destináronse ás instalacións deportivas municipais. “Recoñecemos e destacamos o traballo da alcaldesa Nava Castro e todo o seu equipo de goberno e reafirmamos o compromiso da Deputación para seguir colaborando co Concello de Ponteareas”, concluíu o presidente Luis López.

Galerias de imaxes