O vicepresidente da Deputación de Pontevedra, Rafa Domínguez, deu conta este venres da aprobación da concesión das axudas aos clubs de deporte náutico da provincia, cun reparto de 600.000 € que chegarán a un total de 52 clubs de piragüismo, remo e vela que participan en competicións oficiais durante este ano, catro entidades máis que no exercicio anterior. O vicepresidente lembrou que as axudas “están dotadas de 600.000 euros tralo incremento de 50.000 euros respecto á convocatoria anterior”, unha suba que chega aos 100.000 euros se se ten en conta a convocatoria do ano 2024. Os clubs beneficiarios, que poden competir “en calquera ámbito territorial das tres modalidades”, están localizados nun total de 23 concellos da provincia.

As axudas chegarán a 28 clubs de piragüismo, cun reparto de 335.000 euros, situados nos concellos de Caldas de Reis (Club Náutico Umia), Cambados (Club Piragüismo Cambados), Cangas de Morrazo (Club de Mar Ría de Aldán, Club Náutico Rodeira e Club Piragüismo Aldán), Catoira (Club As Torres), O Grove (Asociación Cultural e Deportiva Mar e Club Breogán), A Illa de Arousa (Club de Piragüismo A Illa de Arousa), Marín (Club Marítimo Tambo), Mondariz Balneario (Club Tea), Pontecesures (Club Náutico Pontecesures), Poio (Club Escola de Piragüismo Poio), Pontevedra (Club Naval de Pontevedra, Club de Piragüismo Verducido Pontillón, Club Río Verdugo e Escola de Piragüismo Cidade de Pontevedra), Ribadumia (Club Náutico O Muíño), Sanxenxo (Piragüismo Portonovo), Tomiño (Club Deportivo Miño), Tui (Club Kayak Tudense e Club Piragüismo Penedo), Vigo (Club de Piragüismo Olívico, Club Kayak Vigo e Piragüismo Oitavén Life), Vilaboa (Club Náutico Cobres e Club Piragüismo Vilaboa) e Vilagarcía de Arousa (Club Piragüismo Vilagarcía).

Tamén se benefician dun reparto de 160.000 € un total de 13 clubs de remo situados en Bueu (Club do Mar Bueu), Cangas de Morrazo (Club de Remo Vila de Cangas), O Grove (Club de Remo Mecos), A Guarda (Club de Remo Robaleira), Marín (Club de Remo Ría de Marín), Moaña (Sociedade Deportiva Samertolameu e Sociedade Deportiva Tirán), Redondela (Círculo Cultural Recreativo de Cesantes), Tui (Club Remo do Miño e Club Remo Tui), Vigo (Club de Remo de Coruxo e Club de Remo Virxe da Guía) e Vilagarcía de Arousa (Club de Remo Vilaxoán).

Por último, recibirán os recursos, 105.000 euros, 12 clubs de Baiona (Monte Real Club de Iates), Cangas de Morrazo (Club Náutico de Cangas), A Illa de Arousa (Asociación Papaventos Kite Club), Marín (Club de Mar Aguete), Moaña (Club Social Moaña Mar), Sanxenxo (Club Náutico de Portonovo e Real Club Náutico de Sanxenxo), Vigo (Agrupación Deportiva Sodim, Asociación de Barcos Clásicos de Vela Lixeira, Club Marítimo de Canido e Real Club Náutico de Vigo) e Vilagarcía de Arousa (Real Club de Regatas Galicia).

“Un dos grandes obxectivos deste goberno”, sinalou Rafa Domínguez, “é facer de Pontevedra a provincia do deporte con maiúsculas”. Con esta inxección de 600.000 euros, asegurou o vicepresidente provincial, “seguimos demostrando unha semana máis que este é o goberno do apoio ao deporte, que estamos ao carón de todos os clubs de todas as modalidades”.

No marco da convocatoria, as axudas concédense en réxime de concorrencia competitiva e cada club pode recibir un máximo de 28.000 euros, sempre que non supere o 40% do orzamento presentado. Entre os gastos que poden subvencionar as entidades deportivas atópanse os gastos federativos, os de competición e adestramento, os de persoal, de material deportivo ou sanitarios.

audios