A Deputación recupera a Bandeira de Traiñeiras tras quince anos e impulsa o Campionato Provincial de Bateis
Moaña acollerá o 21 de xuño o regreso da Bandeira Deputación de Pontevedra, que contará por vez primeira cunha categoría feminina
20/03/2026
A vicepresidenta da Deputación de Pontevedra e deputada de Deportes, Luisa Sánchez, anunciou este venres a recuperación da Bandeira Deputación de Pontevedra de Traiñeiras, que leva sen disputarse desde 2011, e a celebración do Campionato Provincial de Bateis.
Durante o acto de presentación que tivo lugar na sede que a administración provincial ten no Casco Vello de Vigo, no que participaron representantes da Federación Galega de Remo, do Club Remo Miño, do Club Remo Virxe da Guía, da SD Tirán-Pereira e da SD Samertolameu, Luisa Sánchez puxo en valor “un regreso que nos fai moita ilusión” e subliñou o compromiso da institución co deporte que goza de arraigo na provincia. “O remo forma parte do que somos, da nosa relación co mar e dunha cultura deportiva que pasa de xeración en xeración”, destacou.
Tras quince anos de ausencia, a Bandeira Deputación de Pontevedra de Traiñeiras volverá ao calendario e incluirá tanto a XXII edición masculina como a estrea da competición en categoría feminina. As dúas probas contarán coa participación dalgúns dos clubs máis destacados da provincia, que se darán cita o 21 de xuño en Tirán (Moaña). “É un paso imprescindible e moi agardado”, sinalou Sánchez, quen incidiu na importancia de seguir avanzando en igualdade, visibilidade e recoñecemento para as deportistas.
O Campionato Provincial de Bateis celebrarase os días 28 e 29 de marzo en Vigo. O evento contará coa participación dun cento de embarcacións de doce clubs diferentes, o que supón mobilizar a preto de 750 remeiros e remeiras, entre titulares e suplentes. Neste caso, competirán o mesmo número de tripulacións masculinas e femininas.
Esta proba terá carácter selectivo para o Campionato Galego, xa que só os catro primeiros de cada categoría nas finais lograrán o pase á seguinte fase, o que “garante un alto nivel competitivo”.
A vicepresidenta animou á cidadanía a achegarse a estas probas e apoiar aos clubs. “Desde a Deputación seguimos apostando polo deporte, e o remo é sen dúbida un dos nosos grandes embaixadores”, finalizou.
Galerias de imaxes
