A Deputación de Pontevedra asegura que as obras na Casa de Combarro continúan desenvolvéndose no marco do firme compromiso do goberno provincial para garantir a conservación deste inmoble histórico. O organismo asegura que o proxecto sufriu varias modificacións cos consecuentes novos trámites administrativos, pero sen impedir o desenvolvemento dos traballos, iniciados en abril de 2025. Ademais, a institución provincial remarca que, co obxectivo de garantir a conservación do inmoble e a súa integración no conxunto histórico -artístico de Combarro, os traballos non se acometen mediante solucións estandarizadas ou de rápida execución, senón que son executados por oficios especializados, cun elevado grao de detalle, control e prudencia.

O proxecto inicial para a Casa de Combarro tivo que ser modificado debido ás placas con fibras de amianto detectadas que esixiron a adopción de medidas específicas e a elaboración dun proxecto modificado que foi aprobado en febreiro do 2025. En abril dese mesmo ano comezaron as obras que avanzaron conforme as previsións do proxecto xa que, ao tratarse dun inmoble protexido, os tempos non son comparables a unha execución ordinaria nin a unha edificación convencional. Deste xeito, os traballos seguen a construción tradicional e están a ser executados por oficios especializados que esixen un elevado grao de detalle, especialmente no que ten que ver coa cantería e a carpintería. Por outra banda, as reducidas dimensións do espazo interior obrigan a realizar determinadas tarefas en taller, con posterior axuste e montaxe na obra.

Ademais, neste proceso, as condicións meteorolóxicas adversas rexistradas entre outubro do 2025 e marzo deste ano 2026 afectaron a elementos existentes e a outros xa executados, debido ás filtracións de auga no interior e pese a instalar lonas e elementos de cubrición provisional. Deste xeito foi necesario redactar un proxecto modificado que contemplase as incidencias xurdidas e aprobar, o 24 de abril deste ano, un novo convenio por Resolución Presidencial para avanzar na finalización da intervención. Mentres, os traballos que non se ven afectados polo contido do proxecto modificado nunca se detiveron e continúan, en particular os que teñen que ver con acabados interiores de cantería e de carpintería estrutural.