89 persoas de 19 concellos da provincia desfrutarán a partir deste domingo do programa de termalismo da Deputación de Pontevedra +Benestar con estadías no Hotel Carlos I Silgar, en Sanxenxo, e no Balneario de Mondariz. En concreto, trátase de veciños e veciñas dos concellos de Baiona, Cangas do Morrazo, Lalín, Marín, Moaña, Meaño, As Neves, Nigrán, Pontevedra, Oia, Redondela, Ribadumia, O Rosal, Salceda de Caselas, Sanxenxo, Soutomaior, Vigo, Vilaboa e Vilagarcía de Arousa.

Ao detalle, ata 43 persoas de Baiona, Cangas do Morrazo, Lalín, Marín, Moaña, As Neves, Oia, Pontevedra, O Rosal, Redondela, Salceda de Caselas, Soutomaior, Vigo, Vilaboa e Vilagarcía de Arousa desfrutarán das actividades de +Benestar no Hotel Carlos I Silgar, en Sanxenxo desde o domingo 7 de decembro; e outras 46 de Cangas do Morrazo, Lalín, Marín, Meaño, Nigrán, Pontevedra, Redondela, Ribadumia Sanxenxo, Soutomaior e Vilaboa farán o propio no Balneario de Mondariz desde o luns 8 de decembro.

No marco do programa de termalismo +Benestar, preto de 2.200 persoas de máis de 55 anos de 60 concellos da provincia pasarán seis días e cinco noites en balnearios, talasos ou spas de Sanxenxo, Mondariz, O Grove e Lalín. A Deputación de Pontevedra pretende con esta iniciativa facilitar aos veciños da provincia o acceso a actividades de ocio saudable e envellecemento activo en establecementos hostaleiros e, ao mesmo tempo, dinamizar a economía da provincia, impulsando a creación e o mantemento de postos de traballo no sector turístico durante os períodos de menor actividade.

O organismo provincial subvenciona as prazas de réxime xeral con 100 €, mentres que as de réxime especial están subvencionadas con 400 €. Ademais da estadía, o paquete de +Benestar comprende a pensión completa, o uso do spa, do balneario ou doutras instalacións de características similares un mínimo de dúas horas ao día, e tamén o traslado de ida e volta en autobús aos establecementos desde os concellos de Vigo, Soutomaior ou Pontevedra.

Bueu adhírese á lista de concellos colaboradores do programa +Benestar

A Xunta de Goberno desta semana acaba de aprobar a adhesión de Bueu á lista de concellos colaboradores do programa +Benestar. Desde agora, este municipio formará parte dos 57 concellos adheridos a esta lista e que axudan ás súas veciñas e veciños a formalizar os trámites para gozar deste programa no que, este ano, están a participar preto de 2.200 persoas.

Integran a lista de concellos colaboradores de +Benestar, ademais de Bueu, Agolada, Arbo, Baiona, Barro, Caldas de Reis, Cambados, Campo Lameiro, Cangas, A Cañiza, Catoira, Cerdedo-Cotobade, Covelo, Crecente, Cuntis, A Estrada, Forcarei, Fornelos de Montes, Gondomar, O Grove, A Guarda, A Illa de Arousa, Lalín, A Lama, Marín, Meaño, Meis, Moaña, Mondariz-Balneario, Moraña, Mos, As Neves, Nigrán, Oia, Pazos de Borbén, Poio, Ponteareas, Ponte Caldelas, Pontecesures, Pontevedra, O Porriño, Portas, Redondela, Ribadumia, Rodeiro, O Rosal, Salceda de Caselas, Sanxenxo, Silleda, Soutomaior, Tomiño, Tui, Valga, Vilaboa, Vila de Cruces, Vilagarcía de Arousa e Vilanova de Arousa.