A Deputación de Pontevedra leva a galardoada campaña Cando volves?, centrada no interior da provincia, á Feira Internacional do Turismo de Interior INTUR, que terá lugar deste este xoves e ata o 16 de novembro en Valladolid. Turismo Rías Baixas participará cun stand propio neste encontro co obxectivo de divulgar a oferta turística de Rías Baixas, reforzar o seu posicionamento como destino de interior e avanzar na internacionalización e desestacionalización do turismo da provincia.

Para a institución provincial, a participación en INTUR é unha oportunidade única para amosar a posibles visitantes o gran potencial do interior da provincia. Esta feira engloba propostas de cultura, natureza e enogastronomía, e neste eido, o destino Rías Baixas amosará as múltiples facetas e posibilidades que ofertan os 61 concellos da provincia. Ademais, INTUR é o principal evento especializado en turismo de interior de España, que reunirá a máis dun millar de destinos nacionais e internacionais, empresas do sector turístico, axencias, operadores e medios especializados. Deste xeito, a través da participación neste encontro, a Deputación tamén pretende xerar contactos profesionais cos que poder mellorar a comercialización turística do destino.

A promoción do interior é a grande aposta do goberno provincial dentro da súa estratexia turística e por vez primeira este ano protagoniza a campaña anual de Turismo Rías Baixas, Cando volves? Nesta peza audiovisual os lugares do interior da provincia son protagonistas, así como a hospitalidade e o carácter acolledor da súa xente. Ata a data Cando Volves? suma xa cinco distincións internacionais: no Terres Travel Festival de Tortosa, en Tarragona; no US International Awards de Los Ángeles, en Estados Unidos; no International Tourism Festival Africa; no Japan World´s Tourism Film Festival; e no Cannes Corporate Media & TV Awards.