O presidente da Deputación de Pontevedra, Luis López, visitou este venres o concello de Tomiño para asinar coa rexedora Sandra González un convenio de colaboración enmarcado no Programa provincial de infraestruturas e dotacións singulares para a execución da Axenda 2030 (“PON2030”), a través do cal o Goberno provincial financiará con case un millón de euros, o 75 % do orzamento, o proxecto para a rehabilitación enerxética da Casa da Cultura e a mellora da accesibilidade e mobilidade peonil entre os equipamentos públicos da zona do Seixo. O Concello, pola súa banda, achega o 25 % restante, máis de  300.000 euros. Un novo exemplo de colaboración entre administracións que posibilita a transformación dunha das áreas máis poboadas deste municipio do Baixo Miño e, ao mesmo tempo, mellora os servizos e as comodidades de centros sociocomunitarios, explicou o mandatario provincial despois de asinar o acordo.

O proxecto, valorado en máis de 1,3 millóns de euros, céntrase na transformación da Casa da Cultura de Tomiño e de toda a súa contorna nun radio de acción de 200 metros. O obxectivo da intervención é crear un complexo cultural de referencia, eficiente, accesible, moderno, respectuoso co medio e que será complementado cunha reforma urbana centrada na mobilidade peonil, a creación de zonas de convivencia na rúa e a ampliación de zonas verdes. Para acadar este obxectivo, a obra dividirase en dous focos de acción. Por un lado, na Casa da Cultura procederase á rehabilitación integral da envolvente do edificio, á reforma das instalacións de ventilación e climatización, á implantación dun sistema de reciclaxe de augas pluviais para regar os xardíns, á renovación dos aseos e á mellora do illamento acústico. Por outro, nas rúas da contorna crearase un itinerario de preferencia peonil para conectar todos os edificios públicos da zona do Seixo, un espazo de convivencia de plataforma única, con zonas de estancia e aparcamentos disuasorios, e novas zonas axardinadas. Así mesmo, reconfiguraranse os viarios e implantaranse medidas de calmado de tráfico.

Segundo se recolle no convenio, as obras deberán estar rematadas antes do 30 de abril de 2025. A sinatura deste protocolo entre a Deputación e o Concello de Tomiño realízase coa modificación das bases do programa “PON2030” xa en vigor; unha modificación que fai compatible a achega da Deputación coas subvencións doutras administracións sen que o montante concedido ao Concello polo Goberno provincial se vexa reducido.

A deste venres foi a primeira visita institucional do presidente da Deputación a Tomiño e aproveitou para poñer en valor proxectos ambiciosos e transformadores que só son posibles se se tenden pontes entre administracións.

Galerias de imaxes