O presidente da Deputación de Pontevedra, Luis López, anunciou este venres que o audiovisual da campaña de Turismo Rías Baixas A túa meta, o teu destino acaba de recibir a prata na categoría de Produto turístico dos Japan World’s Tourism Film Festival. “Trátase do festival que abre o calendario da rede internacional CIFFT, onde cada ano os nosos materiais reciben numerosos recoñecementos”, lembrou o presidente provincial, que destacou os sete recoñecementos que acadou o ano pasado o vídeo da campaña Cando volves?

“Como sempre que recibimos estes galardóns, estamos moi felices do lonxe que chegan as nosas campañas”, asegurou Luis López, que tamén amosou o orgullo de “contar cunha industria audiovisual de primeiro nivel e que destaca entre a competencia”, xa que este ano participaron no certame do Xapón “máis de 1.300 candidaturas procedentes de 110 países de todo o mundo”.

Luis López lembrou que a campaña deste ano está dedicada ao turismo deportivo, “e aínda que gañar non sexa o obxectivo principal do deporte estamos moi contentos de estrear o palmarés da campaña con esta merecida vitoria”. Tratándose da primeira cita do circuíto anual de festivais, o presidente da Deputación agardou que a vitoria “sexa un bo presaxio e poidamos acabar a temporada de premios con máis recoñecementos”. Para Luis López, esta é “unha mostra de que as Rías Baixas conectan coa audiencia, e de que temos unhas campañas de impacto que logran emocionar, posicionarnos e atraer visitantes”.

A Deputación de Pontevedra reafirma coa campaña A túa meta, o teu destino o seu compromiso coa promoción dun modelo turístico innovador, sostible e de calidade, no que o deporte actúa como motor de desenvolvemento económico, social e territorial. A campaña busca consolidar as Rías Baixas como un destino de referencia para o turismo activo, poñendo en valor os recursos naturais da provincia, apoiando o tecido deportivo e turístico local e impulsando un estilo de vida saudable que conecta territorio, persoas e experiencias.

videos

audios