A Deputación de Pontevedra ten aberto ata o xoves 22 de febreiro o prazo para que os concellos de menos de 20.000 habitantes da provincia poidan solicitar axudas provinciais para impulsar políticas sociais nos seus termos municipais. Trátase de recursos enmarcados no Plan de cofinanciamento dos servizos sociais comunitarios e das Axudas básicas de emerxencia (ABE) que, este 2024, ascenden a 3,7 millóns de euros.

No relativo ao Plan de cofinanciamento dos servizos sociais comunitarios a Deputación pon á disposición dos concellos preto de 3,1 millóns de euros. Destes recursos, 1,2 millóns estarán destinados a sufragar a prestación directa do Servizo de Axuda no Fogar (SAF), o cal atende persoas maiores e con discapacidade, especialmente cando carecen de apoio persoal no seu medio inmediato, e 1,9 millóns serán para cubriren os custos do persoal dos servizos sociais comunitarios municipais. Cada un dos 51 concellos da provincia de menos de 20.000 habitantes terá á súa disposición unha achega máxima que vai desde os 24.000 aos 120.000 euros.

A través deste plan, a institución provincial pretende mellorar a calidade de vida das persoas; posibilitar a súa permanencia no seu contorno de convivencia habitual; favorecer e potenciar a autonomía persoal no propio domicilio; manter, mellorar e recuperar as redes de relación familiar e social; previr situacións de dependencia ou exclusión social; retardar ou evitar a institucionalización; e reforzar a solidariedade e potenciar o voluntariado social.

No que respecta ás ABE, o Goberno provincial mobiliza 600.000 euros para que os concellos poidan atender as demandas da cidadanía que se atope en situación ou risco de exclusión social, con especial atención a quen teña menores ao seu cargo. Destes recursos, 393.000 euros irán destinados a gasto corrente e os 207.000 restantes serán para investimentos. 

A través desta liña de axudas, a Deputación contribúe a sufragar gastos de alimentación, vivenda, subministracións básicas, produtos e servizos de hixiene e limpeza, produtos farmacéuticos, a adquisición de electrodomésticos básicos, o pagamento de desprazamentos ou de reparación e mantemento de vehículos, así como de lentes, lentes de contacto e audiófonos, gastos derivados de tratamentos de odontoloxía, produtos de apoio, atencións de carácter complementario, roupa, calzado ou gastos relacionados co estudo e apoio á infancia. Neste caso, a contía máxima para cada concello vai desde os 7.800 aos 14.050 euros, en función da súa poboación, índice de dependencia global, taxa de desemprego e renda dispoñible bruta.