A Deputación de Pontevedra pon en marcha o novo proxecto +Mobe, un programa piloto que desenvolverá nos concellos de Portas, Campo Lameiro e Moraña e que busca mellorar a mobilidade e conectividade en zonas de reto demográfico do rural da provincia cun orzamento total de 550.000 euros. A Xunta de Goberno da institución provincial acaba de aceptar unha axuda para desenvolver esta iniciativa do Ministerio de Transición Ecolóxica e Reto Demográfico de 500.000 €, sendo un dos 100 proxectos de toda España que reciben financiamento ao abeiro da convocatoria de axudas para proxectos innovadores para a transformación territorial e a loita contra o despoboamento.

Tal e como explicou o vicepresidente provincial, Rafa Domínguez, o proxecto desenvolverase a través de cinco liñas de acción que buscan optimizar o sistema de transporte público para unha mobilidade máis inclusiva e sostible e, ao tempo, fortalecer o acceso a servizos públicos esenciais e de proximidade. Entre elas, inclúese a posta en marcha dun estudo participativo entre a veciñanza para identificar os destinos frecuentes, os horarios preferidos, os puntos de parada ou, entre outras cuestións, as necesidades. En base ás conclusión extraídas, implantaranse novas rutas de transporte e tamén se desenvolverá unha APP móbil con información en tempo real sobre percorridos, xeolocalización, paradas horarios ou tempos de chegada, entre outros.

“Temos claro que a calidade de vida no medio rural depende do acceso aos servizos públicos esenciais e de proximidade, e por iso decidimos poñer en marcha este proxecto”, asegurou o vicepresidente provincial, Rafa Domínguez, que lembrou que a Deputación “quere estar ao carón dos veciños e veciñas dos 61 concellos da provincia, apoiándoos para que teñan as mesmas oportunidades vivan onde vivan”.