A sede de Vigo da Deputación acolle este sábado, a partir das 10:30 horas, o taller “Súbete ao escenario” enmarcado na terceira edición do programa “Descúbreas”, promovido pola institución provincial e Regalamúsica. O obradoiro, que contará coa participación da artista e produtora viguesa Wöyza, está enfocado a que as rapazas e mozas con inquietudes musicais poidan coñecer todos os procesos que calquera artista realiza á hora de subir ao escenario.

Na charla informativa de coaching Wöyza dará a coñecer todos os materiais e documentación técnica previos a un concerto, como o rider técnico, as partes que o compoñen ou cal é a súa importancia no proceso. Tamén abordará outros temas, como a actitude das artistas sobre o escenario ou a planificación da súa posta en escena: a disposición dos elementos, as diferentes persoas que traballan para que o son da banda ou da artista sexa perfecto, e tamén o equipo técnico necesario para levar a cabo unha actuación. Trátase, en definitiva, de coñecer todo o necesario para dominar o directo.

Terceira edición de Descúbreas

Na terceira edición de Descúbreas, oito rapazas de entre 16 e 35 anos foron seleccionadas para recibir un programa de mentorías encamiñadas a que dean os seus primeiros pasos na industria de xeito profesional. Nelas están a recibir o asesoramento de mulleres referentes do sector musical en Galicia e formación transversal a través de obradoiros, sesións grupais e sesións individualizadas.

Tamén nesta edición as participantes contan cunha banda de apoio formada por músicas profesionais e que as acompañarán nas súas actuacións. Ademais realizarase un audiovisual colaborativo coas escolas de música da provincia e vídeos-resumo en inglés e a plataforma web seguirá a actualizar o seu directorio de mulleres profesionais e a ofrecer vídeo-titoriais, ademais de distribuír unha newsletter semanal, que incorporou a sección ‘Domingo con elas’, con información sobre contidos musicais ou transversais de artes e disciplinas como a escrita, o cine ou a fotografía.