Consiste nunha estancia de seis días e cinco noites (entrada os domingos pola tarde e saída os venres despois de xantar) nun hotel con talaso, spa ou outras instalacións de características similares da provincia, en réxime de pensión completa e con actividades de animación sociocultural.

O programa “+Benestar” 2026 contará con 2.127 prazas, das cales poderán beneficiarse as persoas que reúnan os seguintes requisitos:

• Estar empadroadas na provincia de Pontevedra.
• Ter 55 anos ou máis.
• Para persoas menores de 55 anos, deberá concorrer nelas algunha das seguintes circunstancias:
  • Ter recoñecido un grao de discapacidade igual ou superior ao 65 %, o cal se acreditará coa tarxeta ou co certificado de recoñecemento do grao de discapacidade.
  • Posuír a condición de pensionista polos conceptos de xubilación, invalidez, viuvez ou outros.
  • Ter aprobada a resolución do programa individual de atención no que se recoñeza a condición de coidadora doutra persoa con recoñecemento de dependencia a través do Sistema para a Atención e Autonomía á Dependencia (SAAD). Na súa falta, as persoas que non cumpran co anterior, deberán ter acreditado, polos servizos sociais comunitarios básicos do seu concello, a necesidade dun respiro familiar.

• Non sufrir ningunha enfermidade ou patoloxía incompatible coa actividade do programa.
• Non padecer alteracións de comportamento que poidan perturbar a normal convivencia nos establecementos nin enfermidades con risco de contaxio.
• Poder realizar as actividades elementais da vida diaria de forma autónoma.

Acompañantes:

A persoa solicitante poderá ir acompañada doutra persoa coa cal desexe participar no programa, sempre e cando esta cumpra tamén todos os requisitos esixidos na data na que remate o prazo de presentación de solicitudes.

Os prezos dos establecementos ofertados, unha vez descontada a subvención da Deputación, detállanse no anexo II.