A Deputación de Pontevedra pecha a xira das food trucks do Sabor das Rías Baixas en Cambados, Dozón e Pontevedra. O broche de ouro a dous meses de posta en valor da gastronomía pontevedresa terá lugar no Castro, en Dozón, o día 29 de maio de 9:00 a 15:00 horas e o 30 de 11:00 a 14:00 e de 17:00 a 20:00 horas; na praza do Concello de Cambados o 31 de maio de 12:30 a 15:30 e de 18:30 a 21:30 horas e na capela de San Mauro de Pontevedra, tamén o 31 de maio, de 12:00 a 18:00 horas. Nestes tres concellos, a Deputación distribuirá de xeito gratuíto preparacións inspiradas nos pratos típicos dos eventos gastronómicos de interese turístico da provincia.

Ao longo destes tres meses O Sabor das Rías Baixas estivo percorrendo a provincia a través de tres rutas polo norte, o centro e o sur divulgando a oferta das festas gastronómicas e promovendo unha xestión sostible dos recursos desde o punto de vista económico, ambiental e social. Ademais das degustacións inspiradas nos pratos típicos destes eventos, nas food trucks repártese material promocional con información das datas de celebración das festas, os produtos gastronómicos de referencia e o lugar exacto onde se celebran.

Ata a data, e a falta de pechar a campaña o próximo domingo, distribuíronse xa máis de 68.000 tapas gratuítas inspiradas nas festas gastronómicas de interese turístico: a Festa do Lacón con Grelos (Cuntis), a Festa do Caldo de Mourente (Pontevedra), a Festa Encontro-Degustación do Millo Corvo (Bueu), Festa da Ostra de Arcade (Soutomaior), a Festa do Requeixo e o Mel (A Neves), a Festa do Choco (Redondela), a Festa do Salmón (A Estrada), a Festa da Troita (Ponte Caldelas), a Festa do Galo de Curral (Vila de Cruces), a Festa da Langosta (A Guarda), a Festa da Vieira e Festa do Albariño (Cambados), a Feira do Viño do Rosal, a Festa do Carneiro ao Espeto (Moraña), a Romaría da Tortilla de Laro e a Festa da Empanada da Bandeira (Silleda), a Festa do Mexillón e o Berberecho (Vilanova de Arousa), a Festa-Feira do Xamón (A Cañiza), a Festa da Lamprea e a Festa da Lamprea Seca (Arbo), a Festa da Ameixa do Carril (Vilagarcía de Arousa), a Festa da Anguía e Mostra da Caña do País (Valga), a Festa do Viño do Condado do Tea (Salvaterra de Miño), a Festa do Marisco (O Grove) e a Feira do Cocido (Lalín).

O Sabor das Rías Baixas é un paso adiante da Deputación para diversificar a oferta turística da provincia, co obxectivo de atraer turismo interno durante a temporada baixa, e para a descentralización das actividades levadas a cabo por Turismo Rías Baixas en todos os concellos. Este programa serve como ferramenta estratéxica para achegar ao público experiencias culinarias vinculadas á identidade cultural da provincia, para crear novas oportunidades de visita e consumo e tamén para favorecer a actividade económica local.