Exposición e actividades de dinamización literaria
“O BOSQUE DOS CONTOS”
Hematocrítico ilustrado por Alberto Vázquez
Salas de exposicións da Sede da Deputación en Vigo
Do 3 de novembro de 2025 ao 11 de xaneiro de 2026
Horario de visita: de luns a venres, de 9:00 a 20:30 h
Inauguración: luns 3 de novembro, ás 17:30 h
"Ola, visitantes do Bosque dos Contos!
Vinde, quero contarvos algo. Sentade nese tronco…
Coidado! Case esmagades unha fada!
Collede un anaco de torta de cenoria e escoitádeme".
A Deputación de Pontevedra e Hematofesti organizan esta exposición, que toma de referencia o título da obra homónima publicada por Anaya no ano 2020 e na que se recompilan os tres primeiros contos xurdidos da colaboración entre o Hematocrítico e o recoñecido ilustrador Alberto Vázquez: Feliz Feroz (2014), Axente Riciños (2016) e O lobo con botas (2018). Un percorrido visual polas ilustracións orixinais no que as e os personaxes dos contos tradicionais conviven nun mesmo escenario, un bosque compartido onde as historias son reinterpretadas con humor, intelixencia e empatía.
A mostra complétase cun punto de lectura onde o público poderá gozar destes tres magníficos contos e dunha proxección audiovisual na que o propio Hematocrítico narra unha das súas obras. Unha experiencia directa, didáctica e lúdica que convida á escoita activa e á participación.
Este proxecto levará parello unha serie de actividades de dinamización da lectura, parte enmarcadas no Hematofesti, festival de literatura infantil e humor que terá lugar do 4 ao 8 de novembro en Vigo.
ACTIVIDADES COMPLEMENTARIAS Á EXPOSICIÓN
Xornadas (5 e 8 de novembro)
Actividade de acceso libre ata completar a capacidade
No marco da exposición, e coincidindo coa celebración da segunda edición do Festival de Literatura Infantil e Humor Hematofesti, os días 5 e 8 de novembro levaremos a cabo dous eventos arredor da ilustración e do álbum ilustrado
Ler máis →CLUB DE LECTURA
Actividade con inscrición previa. Inscrición aberta a partir do martes 4 de novembro ás 9 h
Esta actividade procura dous obxectivos básicos: o fomento da aprendizaxe da lectura, entendida como fonte de coñecemento e diversión, e a dinamización da propia exposición, que convida a adestrar a imaxinación e gozar do pracer de ler.
Ler máis →OBRADOIROS DE ILUSTRACIÓN E ESCRITA
Actividade con inscrición previa. Inscrición aberta a partir do martes 4 de novembro ás 9 h
Ofertánse varios obradoiros de Ilustración para nenos e nenas de 5 a 10 anos e un obradoiro de Escrita Divertida, con María Lado, para nenos de entre 8 e 12 anos
Ler máis →AUTORES
-
Alberto Vázquez
Alberto Vázquez
Ilustrador, debuxante e director de cine de animación, a súa obra destaca por un estilo inconfundible cargado de simbolismo, ironía e crítica social.
No eido da ilustración e da banda deseñada, os seus libros foron editados en países como España, Francia, Italia, Brasil ou Corea, e as súas ilustracións apareceron en publicacións de todo o mundo.
No ámbito do cinema é recoñecido internacionalmente por filmes como Birdboy, Sangre de unicornio, Decorado ou Homeless Home, baseados nas súas propias bandas deseñadas. A súa traxectoria cinematográfica acumula máis de cen premios internacionais en citas coma os festivais de Annecy, Chicago, Premios Platino, Foyle (preseleccionado para os Óscar), Expotoon ou Méliès de Prata. As súas obras foron exhibidas en prestixiosos festivais de todo o mundo, entre outros, Cannes, os Premios do Cine Europeos, Toronto, Annecy, Clermont-Ferrand, Animafest Zagreb ou Slamdance.
Dentro do ámbito nacional, as súas películas foron galardoadas con catro premios Goya: en 2012, á mellor curtametraxe de animación por Birdboy; e en 2017, á mellor película de animación por Psiconautas e á mellor curtametraxe de animación por Decorado. En 2022 alzou o seu cuarto Goya pola longametraxe Unicorn Wars.
O pasado 24 de outubro estreou nos cines a súa última longametraxe, Decorado, inspirada na súa propia curta homónima de 2017.
-
Hematocrítico
Hematocrítico
Escritor, humorista e mestre de educación infantil, o Hematocrítico converteuse nunha figura central da cultura popular e das redes sociais grazas ao seu enxeño, humor e capacidade para conectar co público.
O seu proxecto "El Hematocrítico de Arte", nacido dun blog de Tumblr onde lles poñía subtítulos cómicos a obras de arte, converteuse nun fenómeno viral con máis de 500.000 seguidoras e seguidores e acabou transformándose nunha triloxía levada ao formato libro. Aquel éxito marcou un punto de inflexión na traxectoria dun mestre que coñecía á perfección os mecanismos do humor, tanto para o público infantil coma para o adulto.
En 2014 publicou o seu primeiro libro infantil, Feliz Feroz (Anaya), ilustrado por Alberto Vázquez, que se converteu nun éxito internacional e foi traducido a varias linguas e adaptado ao formato musical en Corea. A partir de entón, combinou a súa carreira de humorista e guionista coa de autor de literatura infantil, ata consolidarse como un dos nomes de referencia do xénero en España, con máis de cincuenta títulos publicados.
Feliz Feroz foi incluído na prestixiosa selección White Ravens da Biblioteca Internacional da Xuventude de Múnic e recibiu o Premio Fundación Cuatrogatos. Axente Riciños entrou na lista de honra da revista Cuadernos de Literatura Infantil y Juvenil e O lobo con botas, na lista de honra da Organización Española para o Libro Infantil e Xuvenil.
O humor foi o seu tótem, na vida e na obra. A literatura infantil foi o seu medio para expresar a súa esencia máis verdadeira: un neno dentro do corpo dun adulto.
Dirección e coordinación
-
Llerena Perozo
Llerena Perozo
Llerena Perozo Porteiro (Vigo, 1974) é a produtora do Hematofesti.
Colaboradora regular en medios de comunicación (Praza.gal, La Voz de Galicia, Radio Galega, TVG2, Grial), publicou tres libros de divulgación sobre igualdade e ecoloxía, varios libros destinados ao público infantil e xuvenil e as novelas Pérez. Historia dun triunfo (Galaxia, 2021) e Os anos tranquilos (Edicións Xerais de Galicia, 2024). En maio de 2025 esta última verá a luz en castelán nunha edición ampliada con Roca-Penguin Random House.
Entre 2012 e 2018 dinamizou xunto con María Lado o espazo infantil dos programas “Galicia, ceo das letras” e “Nexos para a cultura e o pensamento” para o departamento de Acción Cultural da Cidade da Cultura. Desde o ano 2001 imparte cursos e obradoiros de escrita, comunicación para mulleres, obradoiros de comunicación para políticas, políticos e xestoras públicas, para empresas e particulares por todo o territorio galego. Tamén impartiu innumerables obradoiros infantís e xuvenís ao longo da súa traxectoria profesional, traballou na dirección de proxectos en Versátil Servizos Editoriais e o seu selo Auga Editora entre 2014 e 2020. Previamente desempeñou traballos de creación e xestión de proxectos culturais e de igualdade no eido cultural para entidades coma a Fundación Cidade da Cultura de Galicia, Eduardo Galeano en Galicia, Xacobeo 10 SA, Curtocircuíto 2005 ou Teatro de Papel Producciones.
Desde 2020 dirixe a súa propia empresa, dedicada á cultura no máis amplo sentido da palabra.
-
Ledicia Costas
Ledicia Costas
Ademais de creadora e directora do festival Hematofesti, Ledicia Costas Álvarez (Vigo, 1979), é unha das autoras máis recoñecidas e traducidas da literatura galega, con obras en linguas coma o persa, o coreano, o italiano ou o búlgaro.
A súa primeira novela, Unha estrela no vento, viu a luz no ano 2000. Desde entón publicou máis de trinta obras en galego e castelán que non deixan de reeditarse, tanto de narrativa infantil e xuvenil coma adulta e tamén poesía, en Edicións Xerais de Galicia, Anaya, Destino ou Nórdica Libros, entre as editoriais españolas máis relevantes.
No campo da literatura infantil e xuvenil (LIX) conta con importantes recoñecementos coma o Premio Nacional de Literatura Infantil e Xuvenil concedido en 2015 polo Ministerio de Cultura pola súa obra Escarlatina, a cociñeira cadáver. Foi merecedora en dúas ocasións do Premio Merlín de Literatura Infantil e é a única persoa na historia do Premio Lazarillo (o decano da LIX en España) que logrou gañar en tres ocasións, a última en 2022 con A lebre mecánica.
En 2020 recibiu o Premio da Cultura de Galicia de Creación Literaria e en 2023 foi distinguida pola Xunta de Galicia coa Medalla Castelao, que recoñece a valía da súa achega á cultura en toda a súa traxectoria profesional.
No ámbito internacional recibiu recoñecementos coma o premio White Ravens, concedido pola Biblioteca de Múnic, ou a inclusión na Lista de honra de Ibby.
En 2022 regresou á poesía con Ultraluz, gañadora do prestixioso XX Premio de Poesía Afundación. A súa obra para adultos tamén inclúe as novelas Infamia (2019), Golpes de luz (2021) e Pel de cordeiro (2024).
Novas relacionadas
{"classPK":13863471,"groupId":"37861","name":"o_bosque_dos_contos.jpg","alt":"O Bosque dos Contos","title":"o_bosque_dos_contos.jpg","type":"document","uuid":"0b366ded-cbc8-dee6-064c-4151c134d1c4","fileEntryId":"13863471","resourcePrimKey":"14001123"}
A Deputación esgota as prazas para o club de lectura “Os contos de lobicán” e os obradoiros de xoguetes ópticos, debuxo tolo e escrita divertida de O Bosque dos Contos
12/11/2025
{"classPK":13909872,"groupId":"37861","name":"o_bosque_dos_contos_2.jpg","alt":"Luisa Sánchez na inauguración da exposición O bosque dos Contos","title":"o_bosque_dos_contos_2.jpg","type":"document","uuid":"c47e0510-a4e6-345b-95bf-58dd5e0cf540","fileEntryId":"13909872","resourcePrimKey":"13910203"}
A sede viguesa da Deputación énchese de historias, humor e imaxinación coa mostra ‘O bosque dos contos’
03/11/2025