A deputada provincial Belén Cachafeiro anunciou que a Deputación de Pontevedra aprobará este venres na Xunta de Goberno 106.647 euros para que o concello de Vila de Cruces poida realizar melloras no campo de fútbol do Camballón. Trátase da totalidade dos recursos que o concello ten a súa disposición no marco do III Plan Extraordinario de Infraestruturas Deportivas, dotado de 8 millóns de euros con destino a que os municipios de menos de 50.000 habitantes da provincia poidan subvencionar proxectos municipais de construción de novas instalacións e espazos públicos de uso deportivo, así como para a modernización, remodelación e mellora de instalacións e espazos xa existentes.

A deputada provincial Belén Cachafeiro detallou que os 106.647 euros que recibirá Vila de Cruces servirán para construír un muro que mellore tanto a seguridade dos xogadores como a visibilidade dos espectadores no campo de fútbol do Camballón. En liñas xerais, será un muro de pedra granítica con acabado rústico na cara vista sobre o que se construirá un peche e unha rede de 3,5 metros de altura para que as pelotas non invadan a propiedade lindeira.

“O municipalismo e o deporte son dúas das nosas prioridades, e esta actuación é unha boa mostra diso”, asegurou Belén Cachafeiro. “Cando nos referimos á provincia do deporte referímonos tamén ao impulso que estamos a dar desde a Deputación para modernizar instalacións deportivas nos concellos a través dos Plans Extraordinarios de Infraestruturas Deportivas. Imos xa pola súa terceira edición, que conta con 8 millóns de euros de orzamento que, sumados ás dúas anteriores, supón un investimento de 20 millóns de euros nestes case tres anos de goberno”, remarcou a deputada.