O presidente da Deputación de Pontevedra, Luis López, deu conta este venres do visto bo a novos recursos ao abeiro do III Plan Extraordinario de Infraestruturas Deportivas para o Concello de Cambados, que recibirá máis de 160.000 euros para a substitución da cuberta e a renovación do pavimento deportivo do pavillón do Pombal. Ademais destes recursos para Cambados, a Xunta de Goberno do organismo provincial tamén aprobou esta semana outros preto de 1,2 millóns de euros para que A Caniza, A Estrada, A Guarda, As Neves, Covelo, Marín, Ponte Caldelas, Portas e Soutomaior impulsen e melloren dotacións deportivas baixo o paraugas deste plan provincial.

“Dez concellos máis e dez novos exemplos de como o Plan Extraordinario de Infraestruturas Deportivas, que reparte 8 millóns entre os concellos de menos de 50.000 habitantes, nos axuda a seguir construíndo a provincia do deporte na que queremos que se converta Pontevedra”, asegurou o presidente da Deputación.

Coa axuda aprobada, que é a totalidade dos recursos que lle corresponden a Cambados ao abeiro do III Plan Extraordinario de Infraestruturas Deportivas, o Concello procederá á substitución da cuberta e do caleiro do pavillón polideportivo do Pombal, así como a reparación e posta en valor dos elementos interiores afectados polas filtracións. En concreto, levaranse a cabo traballos previos como a retirada da cuberta actual e a limpeza e tratamento da estrutura metálica para evitar a corrosión, e executaranse diferentes melloras no edificio, que inclúen a reparación de fiestras e peches e o acondicionamento de gradas e elementos existentes. Ademais, no relativo ao pavimento deportivo, repararanse diferentes zonas danadas, e procederase ao lixado, pulido e novo acabado adaptado a uso intensivo. Finalmente procederase ao pintado e marcado regulamentario das diferentes pistas deportivas (baloncesto, fútbol sala, balonmán, voleibol e minibasket).

audios