O presidente da Deputación de Pontevedra, Luis López, visitou este venres o novo parque infantil de Ánkar, na parroquia de San Salvador de Poio, onde o goberno provincial vén de investir un total de 160.000 euros, financiados ao 100 % polo organismo provincial  a través dos recursos do Plan +Provincia, para a renovación e rehabilitación integral deste espazo de lecer infantil. Acompañado polo alcalde Ángel Moldes, o mandatario provincial puxo en valor a pegada dos plans de investimento da Deputación nos concellos para a transformación dos espazos públicos. “O +Provincia é unha ferramenta que dota aos concellos da provincia de máis fondos ca nunca para facer realidade obras como esta, un instrumento que fomenta a autonomía dos gobernos locais e a demostración máis clara de que a Deputación é o mellor aliado posible dos concellos”, afirmou o mandatario provincial despois de comprobar o remate das obras.

A actuación centrouse nunha área de 300 metros cadrados que conta con novos elementos de xogo máis modernos e seguros, así como mobiliario urbano renovado que converterá este parque nun novo punto de encontro para a veciñanza de San Salvador. Así mesmo, o novo parque infantil estreitará os lazos da veciñanza coa historia e cultura mariñeira de Poio, pois a zona de xogos conta cun barco inspirado na carabela Santa María, unha das tres naves que chegou por primeira vez a América nunha expedición liderada por Cristóbal Colón, o navegante que, segundo varias teorías, podería ser orixinario da veciña localidade de Portosanto, en Poio. “É unha obra que reforza o vínculo coa tradición e historia ligada ao mar, mellora a imaxe do barrio e ofrece alternativas de lecer seguras e modernas ás familias”, resumiu López.

Neste sentido, o mandatario provincial quixo poñer en valor o labor realizado polo alcalde Ángel Moldes e o seu equipo de goberno para poñer en marcha este tipo de proxectos e conseguir financiamento doutras administracións como a Deputación. “En pouco máis de dous anos, está a conseguir que Poio deixe de ser noticia pola falta de investimentos e a parálise para converterse nun Concello que avanza e tende pontes con todas as administracións para sacar adiante proxectos”, recoñeceu o dirixente, quen reafirmou o compromiso da Deputación cos concellos da provincia como o de Poio, onde leva investidos neste mandato un total de 3,5M€.

Galerias de imaxes