O presidente da Deputación de Pontevedra, Luis López, destaca un impulso de máis de 200.000 euros que o goberno provincial está a dar á Rapa das Bestas, Festa de Interese Tutístico Internacional, a través do Plan de Sustentabilidade Turística en Destino do Deza, Tabeirós e Terra de Montes que serviu para a renaturalización da Carballeira do Campo do Medio e a creación dun museo virtual centrado na festa que se presentou este venres na localidade estradense de Sabucedo. “A Rapa das Bestas é moito máis ca unha celebración local para darlle aos cabalos salvaxes so coidados que precisan. A Rapa das Bestas é universal, é a mostra da riqueza cultural, natural e patrimonial da provincia; é a demostración do enorme potencial que ten o noso rural e é un dos grandes emblemas da nosa aposta polo turismo de interior”, declarou o mandatario provincial nun acto no que tamén participou o alcalde da Estrada, Gonzalo Louzao.

O presidente provincial vén de participar este venres, na Carballeira de Sabucedo, na presentación dunha festa na que aproveitou para dar a coñecer as iniciativas impulsadas pola Deputación en materia de turismo tanto no tocante a esta festa como na Estrada a través do Plan de Sustentabilidade Turística en Destino das comarcas do Deza, Tabeirós e Terra de Montes. Un programa aprobado no mandato anterior, que recibiu de fondos europeos un total de 2M€ malia carecer de proxectos maduros e que o actual goberno provincial foi quen de redefinir para darlle un novo pulo ao destino que promove Turismo Rías Baixas, un modelo caracterizado pola sustentabilidade, a descentralización e a aposta polo interior da provincia.

“Unha das campañas mellor valoradas, máis premiadas e máis innovadoras de Turismo Rías Baixas foi a do ano pasado, ‘Cando Volves?’, na que demos a coñecer a provincia sen amosar nin un so metro de praia.

Esa aposta polo turismo rural, de interior, sustentable e descentralizado non foi algo puntual. Forma parte dunha estratexia a longo prazo na que encaixa tamén este Plan de Sustentabilidade Turística para a comarca do Deza, Tabeirós e Terra de Montes”, contextualizou o presidente antes de presentar dúas das iniciativas incluídas neste plan e directamente relacionadas coa Rapa das Bestas de Sabucedo. Unha foi a renaturalización da Carballeira do Campo do Medio cun investimento de 110.000€, para que mellorar a accesibilidade e que volva funcionar como punto de encontro da veciñanza e dos milleiros de visitantes que desfrutan cada ano da Rapa das Bestas. Outra foi a creación dun Museo Virtual da Rapa das Bestas, ao que se destinaron 133.500€, para que o visitante se somerxa de cheo nesta festa a través de vídeos inmersivos en 360 grados, con experiencias audiovisuais interactivas, recreacións dixitais da festa e con información cultural sobre a festa os cabalos.

Ademais, a Deputación mantén a colaboración coa Asociación Rapa das bestas de Sabucedo cunha achega de 10.000 euros, un aumento de 2.000€ con respecto á aportación do ano 2024; así como o deseño dun roteiro de 10 quilómetros por esta contorna de enorme valor natural e patrimonial, e a promoción permanente da Rapa das Bestas en todos os soportes da Deputación e de Turismo Rías Baixas.

“A Rapa das Bestas é universal, un dos máis destacados emblemas da provincia e o compromiso da Deputación coa protección e promoción desta festa de interese turístico Internacional está máis que acreditado. Con todo, a nosa aposta polo turismo de interior na Estrada e nesta comarca non se limita unicamente a esta festa”, puntualizou López antes de citar outras propostas incluídas neste PSTD como a Ruta da Sidra da Estrada, a promoción turística do Concello como destino ligado á natureza e especializado en turismo familiar ou a creación de murais relacionados coa cultura e a identidade da comarca. Así mesmo, este proxecto promociona tamén o astroturismo, o turismo deportivo co proxecto Peribici e as rutas de peregrinación que atravesan este territorio.

Despois de poñer en valor o labor do deputado de Turismo, Jesús Vázquez Almuíña, da directora de Turismo, Romina Fernández; e do persoal de Turismo Rías Baixas, así como a colaboración de alcaldes da comarca como Gonzalo Louzao para executar a tempo as iniciativas deste Plan de Sustentabilidade Turística en Destino do Deza, Tabeirós e Terra de Montes. “Damos pasos adiante na sustentabilidade do turismo, avanzamos na descentralización do noso destino e impulsamos o turismo de interior e o rural da provincia”, concluíu o presidente Luis López.