A Deputación de Pontevedra abre este xoves 16 de abril o prazo para que os clubs e federacións deportivas organicen competicións ou eventos na provincia este ano, dotadas con 550.000 euros. O prazo será de 20 días hábiles e as bases poden consultarse no Boletín Oficial da Provincia de Pontevedra.

Estas axudas provinciais, das que o pasado ano se beneficiaron 153 clubs e federacións da provincia, divídense en dúas liñas. A primeira delas, dotada con 300.000 euros, vai dirixida a organizar competicións deportivas federadas oficiais de ámbito estatal ou internacional como campionatos ou copas de España, de Europa ou do mundo, e tamén eventos non encadrados na tipoloxía anterior pero con participación acreditada de equipos, seleccións ou deportistas internacionais.

A segunda das liñas, dotada con 250.000 euros, inclúe as competicións e eventos deportivos oficiais e non oficiais de todos os ámbitos territoriais non incluídos na liña un. Tanto nesta como na primeira liña, os recursos da Deputación permitirán subvencionar gastos federativos, de viaxe, de organización, publicitarios, sanitarios ou de material e premios.