O presidente da Deputación de Pontevedra, Luis López, informou este venres de que a Xunta de Goberno acaba de aprobar un novo convenio coa Universidade de Vigo para apoiar os estudantes que realicen programas de intercambio internacionais como o Erasmus+ ou outros. O convenio está dotado de 100.000 euros cos que se outorgarán mil axudas complementarias a estas alumnas e alumnos, un total de 100 bolsas con cadanseus 1.000 euros, que permitirán “que a mocidade, o piar desta provincia, sexa a mellor preparada da historia”.

As 100 bolsas están destinadas unicamente ao alumnado dos campus cos que conta a Universidade de Vigo na provincia, nas cidades de Vigo e Pontevedra, e permitirán contribuír nos seus gastos de estadía no estranxeiro. O obxectivo é promover a participación do alumnado universitario nos intercambios formativos e contribuír á súa formación integral, así como á súa adaptación ás esixencias do mercado laboral en Europa e no resto do mundo.

O presidente provincial, Luis López, salientou que grazas a estas experiencias “van adquirir todos os coñecementos e destrezas posibles nas súas andainas no estranxeiro”, coa esperanza de que “atopen ao seu regreso á provincia de Pontevedra un territorio próspero onde poder desenvolvelas”.