O deputado provincial Javier Tourís acudiu esta mañá ao CEIP Xesús Golmar, en Lalín, onde fixo entrega do primeiro premio da categoría de Educación Primaria na disciplina de maquetas do concurso escolar A Viaxe de Gotiña, co que a Deputación de Pontevedra buscaba concienciar á comunidade educativa e ás xeracións máis novas da provincia sobre a importancia dun consumo de auga responsable e sustentable.

A proposta do CEIP Xesús Golmar resultou gañadora de entre todas as presentadas e recibiu de man do deputado provincial 25 bonos para visitar as Illas Cíes. Pola súa banda, o CPR Estudio, de Nigrán, acadou o segundo posto e recibirá unha tableta de última xeración, e o CPR Sagrado Corazón de Praceres, en Pontevedra, o terceiro, cun lote de material escolar. O xurado destacou de todos eles, así como do resto de traballos presentados, “a súa excelente calidade”.

Ademais desta categoría, os estudantes de Primaria podían presentar bandas deseñadas, onde a proposta gañadora foi o CEIP Manuel Cordo Boullosa de Ponte Caldelas, seguido do CPR Alba de Vigo e do CEIP Atín-Cela de Mos. Por outra banda, os máis pequenos e pequenas de Infantil realizaron murais, resultando gañador o CRA Ribadumia, seguido do CPR Alba de Vigo e do CEIP Atín-Cela de Mos.

Galerias de imagenes