O deputado provincial Javier Tourís acudiu esta mañá ao CEIP Manuel Cordo Boullosa, en Ponte Caldelas, onde fixo entrega do primeiro premio da categoría de Educación Primaria en disciplina banda deseñada do concurso escolar A Viaxe de Gotiña, co que a Deputación de Pontevedra buscaba concienciar á comunidade educativa e ás xeracións máis novas da provincia sobre a importancia dun consumo de auga responsable e sustentable.

A proposta do CEIP Manuel Cordo Boullosa resultou gañadora de entre todas as presentadas e recibiu de man do deputado provincial 25 bonos para visitar as Illas Cíes. Pola súa banda, o CPR Alba de Vigo acadou o segundo posto e recibirá unha tableta de última xeración, e o CEIP Atín-Cela de Mos, o terceiro, cun lote de material escolar. O xurado destacou de todos eles, así como do resto de traballos presentados, “a súa excelente calidade”.

Ademais desta categoría, os estudantes de Primaria podían presentar maquetas, onde a proposta gañadora foi a do CEIP Xesús Golmar, de Lalín, a segunda a do CPR Estudio, de Nigrán, e a terceira do CPR Sagrado Corazón de Praceres de Pontevedra. Por outra banda, os máis pequenos e pequenas de Infantil realizaorn murais, resultando gañador o CRA Ribadumia, seguido do CPR Alba de Vigo e do CEIP Atín-Cela de Mos. Neste caso a proposta gañadora recibiu unha tableta de última xeración, a segunda un lote de xogos educativos Montessori e a terceira un lote de material escolar.

Galerias de imaxes