O seu obxectivo é impulsar accións que lles permitan ás entidades municipais consolidar os criterios de desenvolvemento que favorezan a xeración de oportunidades, a creación de sinerxías cos axentes de cada lugar e a cohesión territorial.

Ademais, hai que ter en conta que a provincia de Pontevedra ten unha distribución e unhas necesidades territoriais moi diversas que repercuten directamente no conxunto da poboación.

No marco dos retos aos que hai que facerlles fronte determínase a necesidade de mellorar a prestación dos servizos públicos municipais, dotar os concellos de infraestruturas e equipamentos de calidade para impulsar a actividade económica, potenciar o acceso á contorna dixital e reducir a fenda poboacional ao orientar a acción pública cara os pequenos municipios rurais, as entidades máis afectadas pola desigualdade.

Para cumprir estes obxectivos, a Deputación pon en marcha un novo plan para financiar obras e servizos de competencia municipal con base en tres principios: cooperación, equilibrio e respecto á autonomía local.

O Plan +Provincia 2026 -2027 estrutúrase en catro liñas:

• Liña 1: Investimentos, na que se poden contemplar as seguintes casuísticas:
  • Investimentos de carácter anual que se financian co crédito do exercicio 2026 ou do 2027
  • Investimentos de carácter bienal ou plurianual ou que, sen ter este carácter a súa execución ou financiamento, poida comprender máis dun exercicio. Neses casos, a Deputación pode outorgar o financiamento correspondente ao exercicio 2026, ao exercicio 2027 ou a ambos.
• Liña 2: Actividades, gastos correntes e obras puntuais non cualificables como investimentos.
• Liña 3: Activación do emprego 2026.
• Liña 4: Redacción de proxectos para a transformación da mobilidade en zonas rurais e urbanas e/ou proxectos de carácter estratéxico local que posibiliten a transformación e modernización do municipio.