O vicepresidente da Deputación de Pontevedra, Rafa Domínguez, visitou hoxe o centro terapéutico de Afapo, a asociación de familiares de enfermos de Alzheimer e outras demencias da provincia de Pontevedra, onde aproveitou para poñer en valor a utilidade das axudas do programa Provincia +Inclusiva, que neste 2026 vai repartir 210.000 € entre entidades para fomentar a accesibilidade universal. Esta liña de axudas do organismo provincial está dirixida entidades sen ánimo de lucro para a mellora da accesibilidade desde unha perspectiva integral e a promoción da participación activa de todas as persoas en condicións de igualdade e autonomía.

O vicepresidente provincial detallou que Afapo foi beneficiaria deste programa con recursos por valor de máis de 6.500 € que serviron á entidade para adquirir sistemas inclusivos de comunicación (ordenadores, portátil, monitores, teclados e pantalla interactiva). Ademais, Domínguez subliñou que este ano a Deputación destina outros 20.000 € á entidade para o programa de terapias non farmacolóxicas para pacientes con demencia. En anos anteriores, tal e como recordou o vicepresidente, Afapo recibiu recursos do organismo provincial por valor de 60.000 euros para impulsar este proxecto.

Os recursos da liña de axudas Provincia +Inclusiva, que medraron case un 17% que con respecto ao 2024, están dirixidos ás entidades sen fins de lucro da provincia para subvencionar desde obras de mellora da accesibilidade nas súas instalacións, ata os de redacción de proxectos técnicos para executar estas obras, ou de adquisición de sistemas de comunicación ou outros relacionados coa mobilidade e o coidado persoal. As organizacións poderán recibir ata un máximo de 10.000 euros.

Galerias de imaxes