A Deputación de Pontevedra presenta a provincia no stand da Spain Film Commission situado en FITUR como destino atractivo e competitivo para producións audiovisuais e rodaxes cinematográficas. O deputado de Turismo, Jesús Vázquez Almuíña, xunto coa directora de Turismo, Romina Fernández, o experto en turismo cinematográfico, Iñaki Gaztelumendi, e o produtor executivo de “El jardinero”, Miguel Lorenzo, participou na mesa redonda titulada “Cultivando historias: Rías Baixas e o impacto audiovisual no destino”, no marco de Fitur Screen 2026, e compartiu a experiencia da relación entre rodaxes, territorio e promoción turística.

Esta presentación forma parte do obxectivo da Deputación de Pontevedra de avanzar no posicionamento de Rías Baixas como un territorio competitivo para as rodaxes de producións audiovisuais. Neste eido, durante a sesión abordouse o valor da provincia como escenario para producións audiovisuais, destacando a súa diversidade paisaxística, a calidade dos seus recursos técnicos e humanos, así como o papel estratéxico da Rías Baixas Film Commission na captación e acompañamento de proxectos.

Con iniciativas como esta, a Deputación de Pontevedra reforza o seu compromiso coa promoción dun modelo de desenvolvemento baseado na industria audiovisual, sustentable, innovador e vinculado á identidade territorial, consolidando Rías Baixas como un destino de referencia dentro do mapa audiovisual e turístico estatal.

Galerias de imaxes